Thu. Nov 19th, 2026

മലയാള സിനിമാപ്രേമികളെ ആവേശത്തിലാഴ്ത്തി സൂപ്പർതാരം മോഹൻലാലും ഹിറ്റ് സംവിധായകൻ ചിദംബരവും ഒന്നിക്കുന്നു. തരുൺ മൂർത്തി, പ്രിയദർശൻ, ദിലീഷ് പോത്തൻ തുടങ്ങിയ പ്രമുഖ സംവിധായകരുടെ ചിത്രങ്ങൾക്ക് പിന്നാലെയാണ് മോഹൻലാലിന്റെ വമ്പൻ പ്രൊജക്റ്റുകളുടെ പട്ടികയിലേക്ക് ‘മഞ്ഞുമ്മൽ ബോയ്‌സ്’ ഫെയിം ചിദംബരവും എത്തുന്നത്. വൻ ക്യാൻവാസിലൊരുങ്ങുന്ന ഈ ചിത്രത്തിന്റെ ചിത്രീകരണം ഒക്ടോബറിൽ ആരംഭിക്കുമെന്നാണ് റിപ്പോർട്ടുകൾ. പ്രശസ്ത ഛായാഗ്രാഹകൻ ഷൈജു ഖാലിദാണ് ചിത്രത്തിനായി ക്യാമറ ചലിപ്പിക്കുന്നത്.

അതേസമയം, ചിദംബരത്തിന്റേതായി ഇനി പുറത്തിറങ്ങാനുള്ള ചിത്രം ‘ബാലൻ’ ജൂൺ 19-ന് തിയേറ്ററുകളിലെത്തും. ‘രോമാഞ്ചം’, ‘ആവേശം’ എന്നീ തരംഗ ചിത്രങ്ങളുടെ സംവിധായകൻ ജിത്തു മാധവൻ രചന നിർവ്വഹിക്കുന്ന ‘ബാലൻ’ പൂർണ്ണമായും പുതുമുഖങ്ങളെ അണിനിരത്തിയാണ് ഒരുക്കുന്നത്. എഴുത്തുകാരൻ ടി. ചാണ്ടിയുടെ കൊച്ചുമകൻ സതീഷ് ഫെന്നിന്റെ ഭാര്യ ഷൈലജ ദേശായി ഫെൻ നേതൃത്വം നൽകുന്ന ‘തെസ്പിയൻ ഫിലിംസും’, തമിഴിൽ വിജയ്‌യുടെ ‘ജനനായകൻ’, യഷിന്റെ ‘ടോക്സിക്’ എന്നീ വമ്പൻ ചിത്രങ്ങൾ നിർമ്മിക്കുന്ന ‘കെ.വി.എൻ പ്രൊഡക്ഷൻസും’ ചേർന്നാണ് ഈ ചിത്രം നിർമ്മിക്കുന്നത്. കെ.വി.എൻ പ്രൊഡക്ഷൻസിന്റെ ആദ്യ മലയാള ചിത്രം കൂടിയാണിത്.

ഓഡിഷനിലൂടെ അഭിനേതാക്കളെ കണ്ടെത്തിയ ‘ബാലൻ’ എന്ന ചിത്രത്തിന് വേണ്ടി മഞ്ഞുമ്മൽ ബോയ്‌സിന്റെ അണിയറപ്രവർത്തകർ വീണ്ടും ഒന്നിക്കുന്നു എന്ന പ്രത്യേകതയുമുണ്ട്. സുഷിൻ ശ്യാം സംഗീതവും, ഷൈജു ഖാലിദ് ഛായാഗ്രഹണവും, അജയൻ ചാലിശേരി പ്രൊഡക്ഷൻ ഡിസൈനും നിർവ്വഹിക്കുന്നു. വിവേക് ഹർഷനാണ് എഡിറ്റിംഗ്. പബ്ലിക് റിലേഷൻസ് കൈകാര്യം ചെയ്യുന്നത് വൈശാഖ് സി. വടക്കേവീടും ജിനു അനിൽകുമാറുമാണ്. മോഹൻലാൽ-ചിദംബരം ചിത്രത്തിന്റെ കൂടുതൽ വിവരങ്ങൾ ഉടൻ പുറത്തുവിടുമെന്നാണ് സൂചന.