കൊല്ലം: സമൂഹത്തില് മതസ്പര്ധയുണ്ടാക്കാന് ശ്രമിച്ചതിന് വ്യവസായ വകുപ്പ് ഡയറക്ടറായിരുന്ന കെ ഗോപാലകൃഷ്ണന് ഐ എ എസിനെതിരെ കേസ് രജിസ്റ്റര് ചെയ്യണമെന്ന് ആവശ്യപ്പെട്ട് ഡി ജി പിക്ക് പരാതി. കൊല്ലം ഡി സി സി ജനറല് സെക്രട്ടറി ഫൈസല് കുളപ്പാടമാണ് പരാതി നല്കിയത്. സര്വീസ് ചട്ടം ലംഘിച്ചെന്ന ചീഫ് സെക്രട്ടറിയുടെ റിപോര്ട്ട് ഉള്പ്പെടെ ചൂണ്ടിക്കാട്ടിയാണ് പരാതി.
മല്ലു ഹിന്ദു വാട്സ്ആപ്പ് ഗ്രൂപ്പ് വിവാദവുമായി ബന്ധപ്പെട്ട് ഗോപാലകൃഷ്ണനെ ഇന്നലെ സര്ക്കാര് സസ്പെന്ഡ് ചെയ്തിരുന്നു. എന്നാല് ഗോപാലകൃഷ്ണനെതിരെ സ്വമേധയാ കേസെടുക്കാനാവില്ലെന്ന് പോലീസ് നേരത്തെ വ്യക്തമാക്കിയിരുന്നു. ഗ്രൂപ്പിലുള്ള ഏതെങ്കിലും ഉദ്യോഗസ്ഥന് പരാതിയുമായി സമീപിച്ചാല് മാത്രമേ നിയമ നടപടിക്ക് ആലോചിക്കാനാകൂവെന്നാണ് പോലീസ് നിലപാട്.


