സ്ത്രീധന പീഡനം: ശമ്പളം ഭർത്താവിന് നൽകണം, ഭർതൃപിതാവിന് ഒരു കോടി രൂപയുടെ ഫ്ലാറ്റ്; പീഡനാരോപണങ്ങൾക്കിടെ ഐ.ടി. എൻജിനീയർ മരിച്ചനിലയിൽ

പുണെ: വിവാഹശേഷം സ്ത്രീധനത്തിന്റെ പേരിൽ നിരന്തര സമ്മർദവും പീഡനവും നേരിട്ടെന്ന കുടുംബത്തിന്റെ ആരോപണങ്ങൾക്കിടെ മഹാരാഷ്ട്രയിലെ പുണെയിൽ 33കാരിയായ ഐ.ടി. എൻജിനീയർ തൃഷ്ണ രാഹുൽ സക്പാൽ മരിച്ചനിലയിൽ. സെപ്റ്റംബർ 29ന് സ്വന്തം വീട്ടിലാണ് തൃഷ്ണയെ മരിച്ചനിലയിൽ കണ്ടെത്തിയത്. ഭർത്താവിനും ഭർതൃവീട്ടിലെ നാല് കുടുംബാംഗങ്ങൾക്കുമെതിരെ യുവതിയുടെ പിതാവ് നൽകിയ പരാതിയുടെ അടിസ്ഥാനത്തിൽ പൊലീസ് കേസെടുത്തു. ആത്മഹത്യാക്കുറിപ്പിലും ഇവരുടെ പേരുകൾ പരാമർശിച്ചിട്ടുണ്ടെന്നാണ് വിവരം.

തൃഷ്ണയുടെ പിതാവ് ബാലകൃഷ്ണ നികം നൽകിയ പരാതിപ്രകാരം, 2018ലായിരുന്നു തൃഷ്ണയുടെയും രാഹുൽ സക്പാലിന്റെയും വിവാഹം. വിവാഹശേഷം തൃഷ്ണയുടെ മുഴുവൻ ശമ്പളവും ഭർത്താവിന് നൽകണമെന്നും മാതാപിതാക്കളുടെ പേരിലുള്ള ഫ്ലാറ്റ് ഭർതൃമാതാവിന്റെ പേരിലേക്ക് മാറ്റണമെന്നും ആവശ്യപ്പെട്ട് സമ്മർദം ചെലുത്തിയെന്നാണ് ആരോപണം. കൂടാതെ ഭർതൃപിതാവിനായി ഒരു കോടി രൂപയുടെ പുതിയ ഫ്ലാറ്റ് വാങ്ങിനൽകണമെന്നും ആവശ്യപ്പെട്ടിരുന്നതായി പരാതിയിൽ പറയുന്നു. സ്ത്രീധനവുമായി ബന്ധപ്പെട്ട ആവശ്യങ്ങൾക്കൊപ്പം ശാരീരിക പീഡനവും നേരിട്ടെന്നാണ് കുടുംബത്തിന്റെ ആരോപണം.

ഭർതൃവീട്ടിൽ നേരിട്ടതായി പറയുന്ന ശാരീരിക പീഡനങ്ങളെ തുടർന്ന് 2021ൽ തൃഷ്ണ സ്വന്തം വീട്ടിലേക്ക് മടങ്ങിയിരുന്നു. ഇതിനുപിന്നാലെ ഭർത്താവ് രാഹുൽ വിവാഹമോചനക്കേസ് ഫയൽ ചെയ്തെങ്കിലും കേസ് ഇപ്പോഴും കോടതിയുടെ പരിഗണനയിലാണ്. സെപ്റ്റംബർ 29ന് തൃഷ്ണ സ്വന്തം വീട്ടിൽ ജീവനൊടുക്കിയതായാണ് റിപ്പോർട്ട്. സംഭവസ്ഥലത്തുനിന്ന് ലഭിച്ച ആത്മഹത്യാക്കുറിപ്പിൽ ഭർത്താവ് രാഹുൽ, ഭർതൃമാതാവ് വൈശാലി, ഭർതൃപിതാവ് സഞ്ജയ്, ഭർത്താവിന്റെ സഹോദരി ശൈലി, ഭർത്താവിന്റെ മുത്തശ്ശി ശകുന്തള സലൂങ്കെ എന്നിവരാണ് തന്റെ മരണത്തിന് ഉത്തരവാദികളെന്ന് രേഖപ്പെടുത്തിയിട്ടുണ്ടെന്നാണ് വിവരം.

ആത്മഹത്യാക്കുറിപ്പിന്റെയും പിതാവിന്റെ പരാതിയുടെയും അടിസ്ഥാനത്തിൽ അഞ്ച് പേർക്കുമെതിരെ പൊലീസ് എഫ്.ഐ.ആർ രജിസ്റ്റർ ചെയ്തിട്ടുണ്ട്. സ്ത്രീധന പീഡനവും കുടുംബത്തിനുള്ളിലെ അതിക്രമങ്ങളും സംബന്ധിച്ച ഗുരുതര ആരോപണങ്ങളാണ് കേസിൽ ഉയർന്നിരിക്കുന്നത്. ആരോപണങ്ങൾ സംബന്ധിച്ച അന്വേഷണം തുടരുകയാണ്; പ്രതികൾക്കെതിരായ കുറ്റങ്ങൾ കോടതി തെളിയിച്ചിട്ടില്ല. മാനസികമായോ ശാരീരികമായോ പീഡനം നേരിടുന്നവർ ഒറ്റയ്ക്ക് സഹിക്കാതെ വിശ്വസ്തരുടെയും വിദഗ്ധരുടെയും സഹായം തേടണം. കേരളത്തിൽ മാനസികാരോഗ്യ സഹായത്തിനായി ദിശയുടെ 1056 എന്ന നമ്പറിലും ബന്ധപ്പെടാം.

Content Highlights: Trishna Rahul Sakpal, a 33-year-old IT engineer, was found dead in Pune, Maharashtra, amidst allegations from her family that she had faced constant pressure and harassment over dowry following her marriage. She was found dead at her home on September 29. The police have registered a case based on a complaint filed by the woman’s father against her husband and four members of his family.