Thu. Nov 19th, 2026

ആറ് പതിറ്റാണ്ടിലേറെക്കാലം തൻ്റെ മാസ്മരിക ശബ്ദം കൊണ്ട് ഇന്ത്യൻ സംഗീത ആസ്വാദകരെ ഭ്രമിപ്പിച്ച ഗാനകോകിലം എസ്. ജാനകിയുടെ വിയോഗത്തിൽ അഗാധമായ ദുഃഖവും ആദരാഞ്ജലികളും രേഖപ്പെടുത്തി നടൻ മോഹൻലാൽ. തൻ്റെ അരങ്ങേറ്റ ചിത്രമായ ‘മഞ്ഞിൽ വിരിഞ്ഞ പൂക്കളിലെ’ ഗാനങ്ങൾ ആലപിച്ച പ്രിയ ഗായികയോട് തനിക്ക് ഒരിക്കലും മറക്കാനാവാത്ത കടപ്പാടാണുള്ളതെന്ന് അദ്ദേഹം ഓർമ്മിച്ചു. സന്തോഷവും വിഷാദവും കുട്ടിത്തവും ഒരുപോലെ ആവാഹിച്ച ആ മധുരസ്വരം മലയാളിയുടെ മനസ്സിൽ എന്നും തേനും വയമ്പും നിറച്ചു നിൽക്കുമെന്നും, എല്ലാവരെയും സമഭാവനയോടെ കണ്ടിരുന്ന ആ ശാന്തശീലയായ അമ്മയുമായി വ്യക്തിപരമായി ഏറെ അടുപ്പമുണ്ടായിരുന്നുവെന്നും മോഹൻലാൽ തൻ്റെ അനുശോചന സന്ദേശത്തിൽ വികാരാധീനനായി കുറിച്ചു.

മൈസൂരിലെ അപ്പോളോ ബിജിഎസ് ആശുപത്രിയിൽ വെച്ചായിരുന്നു ഇന്ത്യൻ സംഗീത ലോകത്തെ ഈ ഇതിഹാസത്തിൻ്റെ അന്ത്യം. പ്രിയ ഗായികയ്ക്ക് അവസാനമായി ആദരമർപ്പിക്കാൻ മൈസൂരിലെ മഹാരാജാ കോളേജ് ഗ്രൗണ്ടിൽ രാവിലെ 8 മണി മുതൽ വൈകുന്നേരം 4 മണി വരെ പൊതുദർശനം ഒരുക്കിയിട്ടുണ്ട്. തുടർന്ന് വൈകുന്നേരം 4.30-ഓടെ മൈസൂരിലെ കനിയനഹുണ്ടി ഫാം ഹൗസിൽ വെച്ചായിരിക്കും സംസ്കാര ചടങ്ങുകൾ നടക്കുക. സംഗീത ലോകത്തിന് നികത്താനാവാത്ത വലിയൊരു നഷ്ടമാണ് ജാനകിയമ്മയുടെ വേർപാടിലൂടെ സംഭവിച്ചിരിക്കുന്നത്.