തിരുവനന്തപുരം: മാസപ്പടി കേസില് മുഖ്യമന്ത്രി പിണറായി വിജയനും മകള് വീണാ വിജയനും എതിരെ അന്വേഷണം ആവശ്യപ്പെട്ട് കോണ്ഗ്രസ് നേതാവ് മാത്യു കുഴല്നാടന് എം എല് എ സമര്പ്പിച്ച ഹര്ജി കോടതി തള്ളി.
മുഖ്യമന്ത്രിയുടെ മകള് വീണ വിജയന് മാസപ്പടിയായി പണം നല്കിയെന്ന ആരോപണം ഉയര്ന്ന കേസില് സി എം ആര് എല് കമ്പനിക്ക് സംസ്ഥാന സര്ക്കാര് വഴിവിട്ട സഹായങ്ങള് നല്കിയെന്ന മാത്യു കുഴല്നാടന്റെ ആരോപണം തിരുവനന്തപുരം വിജിലന്സ് കോടതി തള്ളി.
കുഴല് നാടന്റെ ആരോപണങ്ങള്ക്ക് തെളിവില്ലെന്ന് കണ്ടെത്തിയാണ് വിജിലന്സ് കോടതി ഈ ആവശ്യം നിരാകരിച്ചത്. സി എം ആര് എല് എന്ന സ്വകാര്യ സ്ഥാപനത്തിന് ധാതുമണല് ഖനനത്തിന് വഴിവിട്ട സഹായം നല്കിയതിനു പ്രതിഫലമായാണ് മുഖ്യമന്ത്രിയുടെ മകള്ക്ക് മാസപ്പടി നല്കിയെന്നായിരുന്നു മാത്യു കുഴല് നാടന്റെ ആരോപണം.
സ്വകാര്യ കമ്പനിക്ക് വഴിവിട്ട സഹായം നല്കിയതിന് തെളിവുകള് ഹാജരാക്കാന് മാത്യുകുഴല് നാടനോട് കോടതി ആവശ്യപ്പെട്ടിരുന്നു. ചില രേഖകള് കുഴല്നാടന്റെ അഭിഭാഷകന് ഹാജരാക്കിയെങ്കിലും ഈ രേഖളിലൊന്നും സര്ക്കാര് വഴിവിട്ട് സഹായം ചെയ്തതായി കണ്ടെത്താനായിട്ടില്ലെന്ന് കോടതി കണ്ടെത്തി.


