Thu. Mar 28th, 2024

കാസര്‍കോട് ഉദുമ സിപിഐഎം ഏരിയ സമ്മേളന സമാപനത്തിന്റെ ഭാഗമായി നടന്ന റെഡ് വൊളണ്ടിയര്‍ മാര്‍ച്ച് ഓവര്‍ ടേക്ക് ചെയ്യാന്‍ ശ്രമിച്ച കാറിനെ ക്യാപ്റ്റന്‍ കാലുകൊണ്ട് തൊഴിച്ച സംഭവത്തില്‍ നല്‍കിയ വാര്‍ത്ത തിരുത്തി ഏഷ്യാനെറ്റ് ന്യൂസ്. രോഗിയുമായി പോവുന്ന കാര്‍ തടഞ്ഞെന്നും സംഭവം വിവാദമായപ്പോള്‍ പാര്‍ട്ടി ജാഥാ ക്യാപ്റ്റനെ പദവിയില്‍ നിന്നും ഒഴിവാക്കിയെന്നുമായിരുന്നു ഏഷ്യാനെറ്റ് വാര്‍ത്ത.

ഈ വാര്‍ത്തയ്‌ക്കൊപ്പം വീഡിയോയും ഉണ്ടായിരുന്നു. എന്നാല്‍ കാറിന്റെ കൂടുതല്‍ ചിത്രങ്ങള്‍ സോഷ്യല്‍ മീഡിയ വഴി പ്രചരിച്ചതോടെയാണ് കള്ളി വെളിച്ചത്തായത്. കാറില്‍ ഡ്രൈവര്‍ മാത്രമെ ഉണ്ടായിരുന്നുള്ളു. ഏഷ്യാനെറ്റ് വാര്‍ത്ത വിശ്വസിച്ച് സിപിഐഎമ്മിനെതിരെ നിരവധിപേര്‍ രംഗത്തെത്തിയിരുന്നു.

ഉദുമയില്‍നിന്നും ബാന്റ് മേളത്തിന്റെ അകമ്പടിയോടെ മേല്‍പറമ്പിലേക്ക് നടന്ന പ്രകടനത്തിന്റെ മുന്നില്‍ അണിനിരന്ന റെഡ് വൊളണ്ടിയര്‍ മാര്‍ച്ച് കളനാട് എത്തിയപ്പോഴാണ് കാസര്‍കോട്ടേക്ക് പോവുകയായിരുന്ന കാറിനെ ക്യാപ്റ്റന്‍ ചവിട്ടിയത്. കാര്‍ ജാഥയെ ചേര്‍ന്നു പോവുകയായിരുന്നു. ഇതാണ് ക്യാപ്റ്റനെ പെട്ടെന്ന് പ്രകോപിതനാക്കിയത്. ഏഷ്യാനെറ്റ് ന്യൂസിന്റെ ഈ വാര്‍ത്ത സോഷ്യല്‍ മീഡിയയില്‍ വ്യാപകമായി പ്രചരിക്കുകയും മാധ്യമപ്രവര്‍ത്തനത്തിന്റെ സത്യസന്ധത ചോദ്യം ചെയ്യപ്പെടുകയും ചെയ്തു.

സോഷ്യല്‍ മീഡിയയില്‍ ഇത്രയധികം ചര്‍ച്ചചെയ്യപ്പെട്ട വാര്‍ത്തയായിരുന്നിട്ടും യാതൊരു വിശദീകരണവും നല്‍കാതെയാണ് ഏഷ്യാനെറ്റ് ന്യൂസ് തിരുത്തല്‍ വരുത്തിയിരിക്കുന്നത്. മുതിര്‍ന്ന മാധ്യമ പ്രവര്‍ത്തകന്‍ പിഎം മനോജ് ഉള്‍പ്പെടെയുള്ള ആളുകള്‍ ഏഷ്യാനെറ്റ് വാര്‍ത്തയ്‌ക്കെതിരെ രംഗത്തെത്തുകയും ചെയ്തു.