Thu. Nov 19th, 2026

തിരുവനന്തപുരം: പി.എസ്.സി അസിസ്റ്റന്റ് പ്രൊഫസർ റാങ്ക് പട്ടികയിലെ ഒന്നാം റാങ്കുകാർക്ക് നിയമനം നൽകാൻ തീരുമാനിച്ചതായി ഉന്നതവിദ്യാഭ്യാസ മന്ത്രി റോജി എം. ജോൺ. സോഷ്യോളജി, ഫിലോസഫി, ഉറുദു വിഷയങ്ങളിലെ ഒന്നാം റാങ്കുകാർക്കാണ് സൂപ്പർ ന്യൂമററി തസ്തികകൾ സൃഷ്ടിച്ച് നിയമനം നൽകുന്നത്. റാങ്ക് പട്ടികയുടെ കാലാവധി അവസാനിക്കാൻ ദിവസങ്ങൾ മാത്രം ശേഷിക്കെയാണ് മന്ത്രിസഭയുടെ അംഗീകാരത്തോടെ തീരുമാനം നടപ്പാക്കുന്നത്. ഉദ്യോഗാർഥികൾക്ക് ആശ്വാസമാകുന്ന നടപടിയാണിതെന്ന് മന്ത്രി വ്യക്തമാക്കി.

പരീക്ഷ നടത്തി റാങ്ക് പട്ടിക പ്രസിദ്ധീകരിച്ചിട്ടും കഴിഞ്ഞ സർക്കാർ മൂന്ന് വർഷത്തോളം നിയമനത്തിന് ശ്രമിച്ചില്ലെന്നാണ് റോജി എം. ജോണിന്റെ വിമർശനം. നിലവിലെ സർക്കാർ റാങ്ക് പട്ടികകളുടെ കാലാവധി ആറുമാസത്തേക്ക് നീട്ടിയെന്നും സാമ്പത്തിക ബാധ്യതയുണ്ടെങ്കിലും സൂപ്പർ ന്യൂമററി തസ്തികകൾ സൃഷ്ടിച്ച് നിയമനം ഉറപ്പാക്കുകയാണെന്നും അദ്ദേഹം പറഞ്ഞു. അസിസ്റ്റന്റ് പ്രൊഫസർ ലോ റാങ്ക് പട്ടികയിൽനിന്ന് 35 ഓളം നിയമനങ്ങൾ നടത്താനും സർക്കാർ തീരുമാനിച്ചതായി മന്ത്രി വ്യക്തമാക്കി. മറ്റ് വിഷയങ്ങളിലെ പട്ടികകളിൽനിന്നും കൂടുതൽ പേർക്ക് നിയമനം നൽകാനുള്ള സാധ്യതകളും പരിഗണനയിലാണെന്നും അറിയിച്ചു.

വി.ഡി. സതീശൻ നയിച്ച പുതുയുഗ യാത്രയ്ക്കിടെ ഉദ്യോഗാർഥികൾ പങ്കുവെച്ച പരാതികൾക്ക് നൽകിയ ഉറപ്പാണ് ഇപ്പോൾ പാലിക്കുന്നതെന്നും മന്ത്രി ഫെയ്സ്ബുക്ക് കുറിപ്പിൽ അവകാശപ്പെട്ടു. അധ്യാപന ജീവിതത്തിലേക്ക് പ്രവേശിക്കുന്ന പുതിയ അധ്യാപകർക്ക് ആശംസകളും നേർന്നു. അതേസമയം, കഴിഞ്ഞ സർക്കാരിനെതിരായ മന്ത്രിയുടെ വിമർശനവും പുതിയ നിയമന തീരുമാനവും രാഷ്ട്രീയ ചർച്ചകൾക്കും വഴിയൊരുക്കിയിട്ടുണ്ട്.

Content Highlights: Higher Education Minister Roji M. John has announced the decision to grant appointments to the candidates who secured the first rank in the PSC Assistant Professor rank lists. Appointments will be provided to the top-ranked candidates in the subjects of Sociology, Philosophy, and Urdu by creating supernumerary posts.





 

Leave a Reply