തിരുവനന്തപുരം എസ്.എ.ടി ആശുപത്രിയിൽ നിന്ന് കാണാതായ ഗർഭിണിയ്ക്കായി എറണാകുളം കേന്ദ്രീകരിച്ച് പൊലീസ് തെരച്ചിൽ തുടരുന്നു. മടവൂർ വിളക്കാട് പേഴുവിളവീട്ടിൽ അൻഷാദിന്റെ ഭാര്യ ഷംന ഷറഫുദ്ദീനെ (21) യാണ് കാണാതായത്. എറണാകുളത്ത് ഇന്നലെ രാത്രി എട്ടുമണിയോടെ ഇവർ ഉണ്ടായിരുന്നുവെന്ന് സ്ഥിരീകരിച്ച് നോർത്ത് ഭാഗം കേന്ദ്രീകരിച്ചാണ് അന്വേഷണം പുരോഗമിക്കുന്നത്. പൂർണ ഗർഭിണിയായിരുന്നതിനാൽ ഏതെങ്കിലും ആശുപത്രിയിൽ ചികിത്സ തേടാനുള്ള സാദ്ധ്യത കണക്കിലെടുത്തിട്ടുണ്ട്.
ഇന്നലെ രാത്രി 8ന് ശേഷം യുവതിയുടെ ഫോൺ മൊബൈൽ സ്വിച്ച് ഓഫായതാണ് പൊലീസിനെ വലയ്ക്കുന്നത്. അതേസമയം യുവതിയെ കണ്ടെത്താൻ കഴിയാത്തതിൽ പ്രതിഷേധിച്ച് ഭർത്താവും കുടുംബവും എസ്.എ. ടി ആശുപത്രിയിൽ പ്രതിഷേധം തുടരുകയാണ്. ഷംനയെ കാണാത്തതിൽ വിഷമിച്ച് കഴിയുന്ന ഇവർ ഇന്നലെ ആശുപത്രിയിലെ ഒ.പി കൗണ്ടർ അടയ്ക്കാൻ അനുവദിച്ചില്ല. രാത്രി അതിനുള്ളിൽ കഴിച്ചുകൂട്ടിയ ഇവർ ഇന്ന് രാവിലെ ഒ.പി കൗണ്ടറിന്റെ പ്രവർത്തനം തടസപ്പെടുത്താനും ശ്രമിച്ചു. വിവരമറിഞ്ഞെത്തിയ മെഡിക്കൽ കോളേജ് പൊലീസ് ഇവരെ ആശുപത്രിയിലെ ഒരുമുറിയിലേക്ക് മാറ്റിയാണ് പ്രശ്നം പരിഹരിച്ചത്.
ഇന്നലെ ഗൈനക്കോളജി ഒ. പിയിൽ ബന്ധുക്കൾക്കൊപ്പം പരിശോധനയ്ക്കെത്തിയതായിരുന്നു ഷംന. പ്രസവത്തിന് അഡ്മിറ്റാകാൻ ഡോക്ടർമാർ തീയതി കുറിച്ച് നൽകിയിരുന്നതിനെ തുടർന്നാണ് ഭർത്താവിനും അടുത്ത ബന്ധുക്കൾക്കും ഒപ്പം ഷംന എത്തിയത്.ഒ.പിയിൽ പരിശോധിച്ച ഡോക്ടർമാർ ആദ്യം രക്ത പരിശോധനയ്ക്ക് കുറിച്ചു നൽകി. രക്തം പരിശോധിച്ച് ഒ.പിയിൽ തിരിച്ചെത്തി. പരിശോധനാ മുറിയിലേക്ക് കയറിയശേഷം തിരികെ ബന്ധുക്കളുടെ അടുത്തെത്തി ഡോക്ടറിൽ നിന്ന് അഡ്മിഷൻ എഴുതി വാങ്ങി വരാമെന്ന്പറഞ്ഞ് വീണ്ടും അകത്തേക്ക് പോയി. ബന്ധുക്കൾ പുറത്ത് മണിക്കൂറുകൾ കാത്തിരുന്നിട്ടും യുവതി വന്നില്ല. തുടർന്ന് തെരഞ്ഞെങ്കിലും കണ്ടെത്താനായില്ല. ഇതോടെ ഭർത്താവ് മെഡിക്കൽ കോളേജ് പൊലീസിൽ പരാതി നൽകുകയായിരുന്നു. പൊലീസെത്തി നിരീക്ഷണ കാമറകൾ പരിശോധിച്ചതിൽ 12 മണിയോടെ രക്ത പരിശോധന പൂർത്തിയാക്കി പുറത്തിറങ്ങുന്ന ദൃശ്യം കണ്ടെത്തി. പിന്നീട് ഷംന അപ്രത്യക്ഷയായതെങ്ങനെയെന്ന് ഇനിയും വ്യക്തമായിട്ടില്ല.
ആറു മണിയോടെ ഭർത്താവിന്റെ സഹോദരിയെ വിളിച്ച് എനിക്ക് കുഴപ്പമില്ലെന്ന് പറഞ്ഞിരുന്നു. ഷംനയുടെ മൊബൈൽ ഫോണിന്റെ ടവർ ലൊക്കേഷൻ കേന്ദ്രീകരിച്ച് നടത്തിയ അന്വേഷണത്തിൽ 12.30 മണിയോടെ കുമാരപുരത്ത് ഉണ്ടായിരുന്നതായി കണ്ടെത്തി. വൈകിട്ട് 5 മണിയോടെ കൊട്ടാരക്കര, 6 ന് തൃപ്പൂണിത്തുറ എന്നിവിടങ്ങളിലും രാത്രി 8 മണിയോടെ എറണാകുളം നോർത്തത് ടവർ പരിധിയിലുമായിരുന്നു മൊബൈൽ ഫോൺ. സൈബർ സിറ്റി എ.സി അനിൽ കുമാർ, മെഡിക്കൽ കോളേജ് സി.ഐ ബിനുകുമാർ എന്നിവരുടെ നേതൃത്വത്തിലാണ് അന്വേഷണം.