ഹോട്ടൽ മുറിയിലേക്ക് വിളിപ്പിച്ചു, വസ്ത്രം കീറി ചോരയൊഴുക്കി; ട്രംപിന്റെ കാമവെറിക്കെതിരെ മുൻ മിസ് സ്വിറ്റ്‌സർലൻഡ്

വാഷിംഗ്‌ടൺ: അമേരിക്കൻ പ്രസിഡന്റ് ഡോണൾഡ് ട്രംപിനെതിരെ ഗുരുതരമായ ലൈംഗികാതിക്രമ ആരോപണവുമായി മുൻ മിസ് സ്വിറ്റ്സർലൻഡ് ബിയാട്രിസ് കോയിൽ. 1993ൽ ന്യൂയോർക്കിലെ പ്ലാസ ഹോട്ടലിൽവെച്ച് ട്രംപ് തന്നെ ബലാത്സംഗം ചെയ്തെന്നാണ് അവരുടെ വെളിപ്പെടുത്തൽ. ജെഫ്രി എപ്സ്റ്റീന്റെ കുറ്റകൃത്യങ്ങളിൽ ട്രംപിന് പങ്കുണ്ടെന്ന ആരോപണങ്ങൾ പരിശോധിക്കുന്നതിനിടെ, ഹൗസ് ജുഡീഷ്യറി കമ്മിറ്റിയിൽ ഡെമോക്രാറ്റുകൾ സമർപ്പിച്ച റിപ്പോർട്ടിലാണ് ഈ ആരോപണങ്ങൾ ഉൾപ്പെടുത്തിയിരിക്കുന്നത്. എന്നാൽ ആരോപണങ്ങൾ വൈറ്റ് ഹൗസ് പൂർണമായി നിഷേധിച്ചു.

16 വയസ്സുമുതലുള്ള പെൺകുട്ടികൾ പങ്കെടുത്തിരുന്ന ‘ഡോണൾഡ് ജെ. ട്രംപ് അമേരിക്കൻ ഡ്രീം’ സൗന്ദര്യമത്സരവുമായി ബന്ധപ്പെട്ടാണ് കോയിലിന്റെ വെളിപ്പെടുത്തലുകൾ. സ്ത്രീകളെ ചൂഷണം ചെയ്യുന്നതിനുള്ള മാർഗമായി ട്രംപും എപ്സ്റ്റീനും ഈ മത്സരം ഉപയോഗിച്ചുവെന്നാണ് അവരുടെ ആരോപണം. 1993 നവംബറിലെ മത്സരത്തിൽ പങ്കെടുക്കാൻ ജിൽ ഹാർട്ട് ക്ഷണിക്കുമ്പോൾ മോഡലായും സാമ്പത്തിക സേവന മേഖലയിലെ പ്രഫഷനലായും പ്രവർത്തിക്കുകയായിരുന്നു കോയിൽ. പ്ലാസ ഹോട്ടലിൽ നടന്ന പത്രസമ്മേളനത്തോടനുബന്ധിച്ചുള്ള ഉച്ചഭക്ഷണവിരുന്നിനിടെ എപ്സ്റ്റീൻ തന്നെ സമീപിച്ചതായും അന്ന് 24 വയസ്സായിരുന്നു തനിക്കെന്നും അവർ റിപ്പോർട്ടിൽ പറയുന്നു. വിസയും ന്യൂയോർക്ക് സർവകലാശാലയിൽ പ്രവേശനവും ലഭ്യമാക്കാമെന്ന് ട്രംപ് വാഗ്ദാനം ചെയ്തതായും കോയിൽ ആരോപിക്കുന്നു.

തന്റെ യാത്രയ്ക്കും മറ്റ് കാര്യങ്ങൾക്കും സഹായം നൽകാമെന്ന് എപ്സ്റ്റീനും വാഗ്ദാനം ചെയ്തതായി കോയിൽ പറയുന്നു. തുടർന്ന് ട്രംപിന്റെ അനുയായികൾ തന്നെ ഹോട്ടലിലെ സ്യൂട്ട് മുറിയിലേക്ക് കൊണ്ടുപോയെന്നും അവിടെവെച്ച് ക്രൂരമായ ലൈംഗികാതിക്രമത്തിന് ഇരയായെന്നും അവരുടെ മൊഴിയിൽ പറയുന്നു. വസ്ത്രങ്ങൾ വലിച്ചുകീറി ശരീരത്തിൽ മുറിവേൽപ്പിച്ചതായും ശരീരത്തിന്റെ വിവിധ ഭാഗങ്ങളിൽനിന്ന് രക്തമൊഴുകിയതായും അവർ ആരോപിച്ചു. സംഭവം പുറത്തുപറയരുതെന്ന് ട്രംപ് ആവശ്യപ്പെട്ടെന്നും സർവകലാശാലയിൽ വീണ്ടും പ്രവേശനം വാഗ്ദാനം ചെയ്തെന്നും കോയിൽ പറയുന്നു. പിന്നീട് സ്വിറ്റ്സർലൻഡിലേക്ക് മടങ്ങിയ ശേഷവും ട്രംപ് ഫോണിലൂടെ ബന്ധപ്പെട്ട് വിസ വാഗ്ദാനം ചെയ്തെങ്കിലും അത് നിരസിച്ചെന്നാണ് റിപ്പോർട്ടിൽ പറയുന്നത്.

അതേസമയം, ആരോപണങ്ങൾ വ്യാജമാണെന്നാണ് വൈറ്റ് ഹൗസിന്റെ പ്രതികരണം. ട്രംപിന്റെ നേട്ടങ്ങളിൽനിന്ന് പൊതുജനശ്രദ്ധ തിരിക്കാനുള്ള ഡെമോക്രാറ്റുകളുടെ ശ്രമമാണ് ഇതിന് പിന്നിലെന്നും വൈറ്റ് ഹൗസ് ആരോപിച്ചു. നിലവിൽ റിപ്പോർട്ടിൽ ഉന്നയിച്ചിരിക്കുന്ന ആരോപണങ്ങളാണ് പുറത്തുവന്നിട്ടുള്ളത്; അവ തെളിയിക്കപ്പെട്ട വസ്തുതകളായി കാണാനാവില്ല. എപ്സ്റ്റീൻ കേസുമായി ബന്ധപ്പെട്ട അന്വേഷണങ്ങൾക്കിടയിൽ പുറത്തുവന്ന ഈ വെളിപ്പെടുത്തൽ അമേരിക്കൻ രാഷ്ട്രീയത്തിൽ വീണ്ടും ചർച്ചകൾക്ക് വഴിയൊരുക്കിയിരിക്കുകയാണ്.

Content Highlights: Former Miss Switzerland Beatrice Köll has leveled serious allegations of sexual assault against US President Donald Trump. She claims that Trump raped her at the Plaza Hotel in New York in 1993.