ഉദ്ഘാടന ചടങ്ങിൽ താൻ ധരിച്ച മഞ്ഞ വസ്ത്രത്തിനെതിരെ ഉയർന്ന സൈബർ ആക്രമണങ്ങൾക്കും സദാചാര പൊലീസിങ്ങിനും എതിരെ തുറന്നടിച്ചുകൊണ്ട് നടി ഐശ്വര്യ ലക്ഷ്മി രംഗത്ത്. രഞ്ജിനി ഹരിദാസുമായുള്ള അഭിമുഖത്തിലാണ് താരം തന്റെ വസ്ത്രധാരണത്തെക്കുറിച്ചുള്ള നിലപാട് വ്യക്തമാക്കിയത്. തനിക്ക് ഇഷ്ടമുള്ള വസ്ത്രങ്ങൾ ധരിക്കാൻ തനിക്ക് മറ്റാരുടെയും അനുവാദം ആവശ്യമില്ലെന്നും, വസ്ത്രത്തിന്റെ പേരിൽ തന്നെ വിമർശിക്കുന്നവരുടെ സംസ്കാരത്തെ ചോദ്യം ചെയ്യുകയാണെന്നും ഐശ്വര്യ പറഞ്ഞു.
താൻ ധരിച്ച ഔട്ട്ഫിറ്റ് തനിക്ക് വ്യക്തിപരമായി വളരെ ഇഷ്ടമായിരുന്നുവെന്നും നെഗറ്റീവ് കമന്റുകളൊന്നും തന്നെ ബാധിക്കാറില്ലെന്നും നടി വ്യക്തമാക്കി. സുഹൃത്തുക്കളും സ്റ്റൈലിസ്റ്റും ആ വസ്ത്രം ധരിക്കേണ്ട എന്ന് മുന്നറിയിപ്പ് നൽകിയിരുന്നുവെങ്കിലും തന്റെ ഫാഷൻ ബോധത്തിന്റെ പുറത്താണ് താനത് തിരഞ്ഞെടുത്തത്. എന്നാൽ തിരുവനന്തപുരത്തെ പഴവങ്ങാടി ഗണപതി ക്ഷേത്രത്തിന് സമീപമുള്ള ഒരു കടയുടെ ഉദ്ഘാടനത്തിനാണ് താൻ ആ വേഷത്തിൽ എത്തിയതെന്നും, അവിടെ ക്യാമറകളുമായി ആളുകൾ എത്തുമെന്ന് താൻ കരുതിയിരുന്നില്ലെന്നും താരം കൂട്ടിച്ചേർത്തു.
ചടങ്ങിൽ വെച്ച് ക്യാമറകൾ മുഖത്തിന് പകരം ശരീരത്തിന്റെ മറ്റ് ഭാഗങ്ങളിലേക്ക് തിരിഞ്ഞപ്പോഴാണ് തനിക്ക് അസ്വസ്ഥത തോന്നിയതെന്ന് ഐശ്വര്യ തുറന്നുപറഞ്ഞു. വ്യക്തിപരമായ അതിരുകൾ ലംഘിച്ചുകൊണ്ടുള്ള ക്യാമറക്കണ്ണുകളുടെ ദൃശ്യവൽക്കരണമാണ് തന്നെ അസ്വസ്ഥയാക്കിയത്. താൻ ധരിച്ച വസ്ത്രത്തിൽ തനിക്ക് യാതൊരു കുഴപ്പവും തോന്നിയിരുന്നില്ലെന്നും, എന്നാൽ മറ്റുള്ളവരുടെ നോട്ടവും വിമർശനങ്ങളും തെറ്റായ രീതിയിലായിരുന്നുവെന്നും അവർ വ്യക്തമാക്കി.
ഒരു സ്ത്രീയുടെ സംസ്കാരം അവളുടെ വസ്ത്രത്തിന്റെ നീളത്തിലോ ക്ലീവേജിലോ അല്ല അളക്കേണ്ടത്, മറിച്ച് അവൾ മറ്റുള്ളവരോട് എങ്ങനെ പെരുമാറുന്നു എന്നതിലാണ് എന്ന് ഐശ്വര്യ ഓർമ്മിപ്പിച്ചു. ആ വസ്ത്രം ധരിച്ചതിന് ശേഷം താൻ തന്റെ സുഹൃത്തുക്കളെ വീഡിയോ കോൾ ചെയ്ത് കാണിച്ചിരുന്നുവെന്നും എല്ലാവർക്കും അതൊരു ഇന്റർനാഷണൽ ലുക്ക് ആണെന്നാണ് തോന്നിയതെന്നും നടി കൂട്ടിച്ചേർത്തു.
താൻ ധരിച്ച വസ്ത്രത്തെക്കുറിച്ച് തനിക്ക് ആരോടും വിശദീകരിക്കേണ്ട ബാധ്യതയില്ലെന്ന് വ്യക്തമാക്കിയ ഐശ്വര്യ, തനിക്കെതിരെ സദാചാര സംരക്ഷകരായി എത്തിയവരുടെ ഭാഷയും സംസ്കാരവുമാണ് യഥാർത്ഥത്തിൽ ചോദ്യം ചെയ്യപ്പെടേണ്ടതെന്നും തുറന്നടിച്ചു. ഇത്തരം വിമർശനങ്ങളെയോ ട്രോളുകളെയോ കാര്യമാക്കുന്നില്ലെന്നും തന്റെ ജീവിതരീതികളെ ബാധിക്കില്ലെന്നും താരം വ്യക്തമാക്കി.
