പാറ്റ്ന: വരാനിരിക്കുന്ന ബീഹാർ നിയമസഭാ തിരഞ്ഞെടുപ്പിന് മുന്നോടിയായി, കേന്ദ്ര ആഭ്യന്തര മന്ത്രി അമിത് ഷാ കോൺഗ്രസ് നേതാവ് രാഹുൽ ഗാന്ധിക്കും രാഷ്ട്രീയ ജനതാദളിനും (ആർ.ജെ.ഡി) എതിരെ രൂക്ഷ വിമർശനം ഉന്നയിച്ചു. ബീഹാറിലെ സീതാമർഹിയിൽ നടന്ന ഒരു പൊതുസമ്മേളനത്തിൽ സംസാരിക്കവെ, കോൺഗ്രസ് പ്രീണന രാഷ്ട്രീയം കളിക്കുകയാണെന്നും, നുഴഞ്ഞുകയറ്റക്കാരാണ് രാഹുൽ ഗാന്ധിയുടെയും കോൺഗ്രസിന്റെയും പ്രധാന വോട്ട് ബാങ്കെന്നും അമിത്ഷാ ആരോപിച്ചു.
മുൻകാലങ്ങളിൽ നടന്ന ഭീകരാക്രമണങ്ങളെക്കുറിച്ച് സംസാരിച്ച അമിത് ഷാ, കോൺഗ്രസ് ഭരണകാലത്ത് ഭീകരർ ഭയമില്ലാതെ പാകിസ്താനിലേക്ക് രക്ഷപ്പെട്ടിരുന്നതായി ആരോപിച്ചു. “കോൺഗ്രസ് കാലഘട്ടത്തിൽ ഭീകരർ ഭയമോ പരിണതഫലമോ ഇല്ലാതെ പാകിസ്താനിലേക്ക് പലായനം ചെയ്തു. അവരെ ചോദ്യം ചെയ്യാൻ പോലും ആരുമുണ്ടായിരുന്നില്ല,” അദ്ദേഹം പറഞ്ഞു.

എന്നാൽ, പ്രധാനമന്ത്രി നരേന്ദ്ര മോദിയുടെ കീഴിൽ ഇന്ത്യ ശക്തമായി പ്രതികരിക്കുന്നുണ്ടെന്ന് അമിത്ഷാ അവകാശപ്പെട്ടു. ഉറി ആക്രമണത്തിന് ശേഷം നടത്തിയ സർജിക്കൽ സ്ട്രൈക്ക്, പുൽവാമയ്ക്ക് ശേഷം നടത്തിയ വ്യോമാക്രമണം, ഏറ്റവും ഒടുവിൽ ‘ഓപ്പറേഷൻ സിന്ദൂർ’ എന്നിവ ഷാ ചൂണ്ടിക്കാട്ടി. പാകിസ്താൻ അതിർത്തി കടന്ന് തീവ്രവാദികളെ ഇല്ലാതാക്കിയ ‘ഓപ്പറേഷൻ സിന്ദൂരിനെ’ പാർലമെന്റിൽ എതിർത്തതിന് അദ്ദേഹം കോൺഗ്രസിനെയും ആർ.ജെ.ഡിയെയും വിമർശിച്ചു. ഭീകരർക്ക് ഉചിതമായ മറുപടി നൽകേണ്ടതുണ്ടോ എന്ന് അദ്ദേഹം ജനങ്ങളോട് ചോദിക്കുകയും ചെയ്തു.
വോട്ടർ പട്ടിക ശുദ്ധീകരണത്തെച്ചൊല്ലി രാഹുൽ ഗാന്ധി നടത്തിയ വിമർശനങ്ങൾക്ക് അമിത് ഷാ മറുപടി നൽകി. വോട്ടർ പട്ടിക ശുദ്ധീകരണം ഒരു പുതിയ കാര്യമല്ലെന്നും, രാഹുൽ ഗാന്ധിയുടെ മുതുമുത്തച്ഛൻ ജവഹർലാൽ നെഹ്റുവാണ് ഇതിന് തുടക്കമിട്ടതെന്നും അദ്ദേഹം പറഞ്ഞു. “ഇപ്പോൾ തിരഞ്ഞെടുപ്പിൽ തോറ്റപ്പോൾ, നിങ്ങളുടെ ബീഹാർ തോൽവിക്ക് വോട്ടർ പട്ടികയെ കുറ്റപ്പെടുത്താൻ തുടങ്ങിയിരിക്കുന്നു,” ഷാ പരിഹസിച്ചു. മിഥിലാഞ്ചലിന്റെ വികസനത്തിനായി ബി.ജെ.പി. എന്തുചെയ്തു എന്ന് ആർ.ജെ.ഡി. അടുത്തിടെ നടത്തിയ പത്രസമ്മേളനത്തിന് മറുപടിയായി, പ്രധാനമന്ത്രി നരേന്ദ്ര മോദി ബീഹാറിനായി 83,000 കോടി രൂപ അനുവദിച്ചിട്ടുണ്ടെന്ന് അദ്ദേഹം പറഞ്ഞു.

