ആലപ്പുഴ: അന്ധവിശ്വാസത്തിനും അനാചാരങ്ങള്ക്കുമെതിരെ പ്രതിഷേധവുമായി എസ്എന്ഡിപി. അന്ധവിശ്വാസത്തിനും അനാചാരങ്ങള്ക്കുമെതിരെ എല്ലാ ജില്ലകളിലും ബഹുജന കൂട്ടായ്മകള് സംഘടിപ്പിക്കുമെന്ന് വെള്ളാപ്പള്ളി നടേശന് പറഞ്ഞു. നവോത്ഥാന നായകരുടെ സ്മൃതി മണ്ഡപങ്ങളിലേക്ക് ഒക്ടോബര് രണ്ടു മുതല് സ്മൃതി യാത്ര നടത്തുമെന്നും ആചാരങ്ങളുടെ പേരില് ദുരാചാരങ്ങള് വര്ധിക്കുന്നുവെന്നും അദ്ദേഹം കൂട്ടിച്ചേര്ത്തു.
ഏക സിവില് കോഡിനെതിരെ സിപിഎം സംഘടിപ്പിക്കുന്ന സെമിനാറിലേക്ക് ക്ഷണം കിട്ടിയെന്ന് വെള്ളാപ്പള്ളി നടേശന് വ്യക്തമാക്കി. തിരക്ക് ആയതിനാൽ തനിക്ക് പങ്കെടുക്കാൻ കഴിയില്ല. അതിനാൽ എസ്എൻഡിപി പ്രതിനിധിയെ അയച്ചു. അരയക്കണ്ടി സന്തോഷ് എസ്എന്ഡിപി പ്രതിനിധിയായി സിപിഎം സെമിനാറിൽ പങ്കെടുക്കും. സെമിനാറിലേക്ക് പോകുന്നതിൽ പ്രശ്നമില്ല. സെമിനാറിൽ എന്ത് പറയുന്നു എന്നതാണ് പ്രധാനം. ബില്ലിന്റെ കരട് വരുന്നതിന് മുന്നേ തമ്മിലടിക്കേണ്ടതുണ്ടോ എന്നും വെള്ളാപ്പള്ളി ചോദിച്ചു.

