✍️ ലിബി. സി എസ്
മുൻ മുഖ്യമന്ത്രിയും സ്വാതന്ത്ര്യസമരസേനാനിയും യുക്തിവാദിയും ആദർശധീരനുമായ രാഷ്ട്രീയനേതാവ്‌ സി.കേശവൻറെ യുക്തിവാദിയായ മകൻ, ഉജ്ജ്വല വാഗ്മി, ബുദ്ധികൂർമയുള്ള ഊർജസ്വലനായ പാർലമെന്റേറിയൻ, കേരളം കണ്ട പ്രഗത്ഭനായ പത്രപ്രവർത്തകൻ, സരസനായ സാഹിത്യകാരൻ എന്നിങ്ങനെ നിരവധി വിശേഷണങ്ങളുള്ള വ്യക്തിയാണ് കെ.ബാലകൃഷ്ണൻ (1924 – 1984).
മലയാള പത്രപ്രവർത്തനരംഗത്ത് പൊതുവേയും വാരികാശാഖയിൽ പ്രത്യേകിച്ചും പുതിയൊരു വഴിത്തിരിവായ ‘കൗമുദി’ വാരിക 1949 ൽ പ്രസിദ്ധീകരിച്ചു. സത്യം തുറന്നു പറഞ്ഞ് സ്വതന്ത്രരാകാൻ തന്റെ തലമുറയോട് ഈ പത്രാധിപർ ആവശ്യപ്പെട്ടു. അങ്ങനെ കാലം ആവശ്യപ്പെടുന്നത് ചെയ്യാനുള്ള വേദിയായി കൗമുദിയെ മാറ്റി. യഥാർത്ഥ പത്രധർമ്മം നിറവേറ്റാൻ അദ്ദേഹം തയ്യാറായി. കെ.ബാലകൃഷ്ണൻ എഴുതിയ മുഖപ്രസംഗങ്ങൾ കൗമുദിയുടെ മൂല്യവും അന്തസും ഉയർത്തി. കൗമുദിക്കുറിപ്പുകൾ എന്ന ശീർഷകത്തിൽ എഴുതിയ മുഖപ്രസംഗങ്ങൾ അന്ന് ചിന്തിക്കുന്നവരെയെല്ലാം വശീകരിച്ചു. പലതും രാഷ്ടീയവേദികളിൽ വൻ ചലനങ്ങൾ സൃഷ്ടിച്ചു.
ഗൗരവമേറിയ ഒരു സിനിമ ഇറങ്ങിയാൽ നാടകം ഉണ്ടായാൽ അതിനെക്കുറിച്ച് കെ.ബാലകൃഷ്ണൻ എന്തു പറയുന്നു, കൗമുദി എന്തു പറയുന്നു എന്ന് ആസ്വാദകൻ അന്വേഷിക്കുമായിരുന്നു. ആരേയും പ്രീതിപ്പെടുത്താതെ വെട്ടിത്തുറന്നുള്ള നിഷ്പക്ഷമായ അഭിപ്രായങ്ങൾക്ക് വലിയ അഗീകാരവും ആദരവുമാണ് ലഭിച്ചത്. എഴുതിത്തുടങ്ങുന്ന പുതിയ പ്രതിഭകളെ പത്രാധിപർ പ്രത്യേകം ശ്രദ്ധിക്കുകയും വലിയ പ്രോത്സാഹനം കൊടുക്കുകയും ചെയ്തു. കേസരിയും കുട്ടികൃഷ്ണമാരാരും മുണ്ടശ്ശേരിയും അഴീക്കൊടും ബഷീറും ദേവും തകഴിയും ലളിതാംബിക അന്തർജനവും എം.ടിയും ജീയും വയലാറും ഒ.എൻ.വി യും പട്ടത്തവിളയും കെ.പി അപ്പനും തുടങ്ങി മലയാളത്തിലെ എഴുത്തുകാരെല്ലാം കൗമുദിക്കുവേണ്ടി എഴുതി.
കൗമുദി തുടക്കം മുതൽ തന്നെ പുറത്തിറക്കിയ ഓണം വിശേഷാൽ പതിപ്പുകൾ വലിയ ശ്രദ്ധ നേടി. എഴുത്തുകാരോട് യാതൊരു വിവേചനവും ഈ പത്രാധിപർ കാട്ടിയില്ല. ചൂടപ്പംപോലെ വിറ്റഴിഞ്ഞ 1964 ലെ ഓണം വിശേഷാൽ പതിപ്പിന് രണ്ടാം പതിപ്പ് പോലും ഇറക്കേണ്ടി വന്നു. ആരേയും പ്രീതിപ്പെടുത്താതെ വെട്ടിത്തുറന്നുള്ള നിഷ്പക്ഷമായ അദ്ദേഹത്തിൻറെ അഭിപ്രായങ്ങൾക്ക് വലിയ അഗീകാരവും ആദരവുമാണ് ലഭിച്ചത്.
മലയാളത്തിൽ ‘പത്രാധിപരോടു ചോദിക്കുക’ എന്ന പംക്തിക്ക് തുടക്കമിട്ടത് ബാലകൃഷ്ണനാണ്. ആ പംക്തിയിൽ നിറഞ്ഞു നിന്ന രാഷ്ട്രീയപ്രവർത്തകനും ചിന്തകനും ധിക്കാരിയും ഏകാകിയും യുക്തിവാദിയും കവിയുമൊക്കെയായ ബാലകൃഷ്ണൻ ഒരു കാലഘട്ടത്തിന്റെയാകെ ആരാധനാ വിഗ്രഹമായിരുന്നു.
ഇന്നത്തെ ‘ബ്രേക്കിങ് ന്യൂസ്’ ആദ്യം അവതരിപ്പിച്ചതും ബാലകൃഷ്ണനാണ്. ആലപ്പുഴ ടിബിയില്‍ കോണ്‍ഗ്രസ് വര്‍ക്കിങ് കമ്മിറ്റി പരമരഹസ്യമായി ഒരുയോഗം ചേര്‍ന്നപ്പോൾ, അവിടെ കാവലിനായി പ്രത്യേകം വിശ്വസ്തരായ പോലീസുകാരെ കണ്ടെത്തി നിര്‍ത്തിയിട്ടും പിറ്റേ ദിവസത്തെ കേരളകൗമുദിയില്‍ വര്‍ക്കിങ് കമ്മറ്റിയില്‍ നടന്നതെല്ലാം വള്ളിപുള്ളി വിടാതെ ബാലകൃഷ്ണന്‍ എഴുതിയ സംഭവം അതിൽ ഒരു ഉദാഹരണമാണ്. 1957-ലെ ഇ.എം.എസ്. മന്ത്രിസഭയുടെ ആദ്യ ബജറ്റ് നിയമസഭയിൽ അവതരിപ്പിക്കുംമുമ്പ് ‘കൗമുദി പത്രത്തിൽ പ്രസിദ്ധീകരിച്ചത് വൻ വിവാദമായിരുന്നു.
സി.പി.രാമസ്വാമി അയ്യരുടെ കിരാതഭരണത്തിന് എതിരെ വിദ്യാർത്ഥിയായിരുന്നപ്പോഴും പിന്നീടും ധീരവും സാഹസികവുമായ നിരവധി സമരങ്ങൾ അദ്ദേഹം നയിച്ചിട്ടുണ്ട്. 1942ൽ ക്വിറ്റ് ഇന്ത്യാ സമരം മുതൽ ജീവിതത്തിലുടനീളം പല സമരങ്ങളിൽ പങ്കെടുത്ത് നിരവധിതവണ ജയിലിലായിട്ടുണ്ട്. അച്ഛനും മകനും ഒരേസമയം തന്നെ പൂജപ്പുര സെൻട്രൽ ജയിലിൽ കിടന്നിട്ടുണ്ട്. ഇന്ത്യയ്ക്കു സ്വാതന്ത്ര്യം ലഭിക്കുമ്പോഴും കെ ബാലകൃഷ്ണൻ ജയിലിൽ ആയിരുന്നു. 1954ൽ തിരു-കൊച്ചി സംസ്ഥാനത്ത് തിരുവനന്തപുരം ഒന്നാം നിയോജകമണ്ഡലത്തിൽ നിന്ന് ആർ.എസ്.പി. സ്ഥാനാർത്ഥിയായി വിജയിച്ച അദ്ദേഹം എം.എൽ.എ ആയി. മികച്ച പാർലമെന്റേറിയൻ എന്ന പേരും സ്വന്തമാക്കിയിരുന്നു. 1971-ൽ അമ്പലപ്പുഴ മണ്ഡലത്തിൽ നിന്നു സുശീലാ ഗോപാലനെ പരാജയപ്പെടുത്തി ലോക് സഭാംഗമായി.
കൗമുദി കുടുംബത്തിൽ പിറന്നതിനാൽ കുട്ടിക്കാലം മുതൽ അച്ചടിയും പത്രങ്ങളും കണ്ടാണ് ബാലകൃഷ്ണൻ വളർന്നത്. മുത്തച്ഛൻ സി.വി കുഞ്ഞുരാമൻ, അച്ഛൻ സി.കേശവൻ അമ്മാവൻ കെ.സുകുമാരൻ എന്നിവരെല്ലാം പത്രം നടത്തിയവരായിരുന്നു. തലമുറയായി വലിയ പത്രാധിപന്മാരായിരുന്നു. അതിൽനിന്നെല്ലാം വ്യത്യസ്തമായി ചെറുപ്പമാണെങ്കിലും പക്വമായ അറിവും ഉന്നതമായ ഭാവനാശേഷിയും ദൃഢബോദ്ധ്യങ്ങളുമുണ്ടായിരുന്ന കെ ബാലകൃഷ്ണൻ എന്ന പത്രാധിപരുടെ ഭാവനയും കരവിരുതും ഓരോ പേജിലും ഉണ്ടായിരുന്നു. സ്വതന്ത്രവും ധീരവുമായ അഭിപ്രായങ്ങളിലൂടെ കൗമുദി പതുക്കെപ്പതുക്കെ മലയാളക്കരയിലെ വായനക്കാരെ രസിപ്പിച്ചും ചിന്തിപ്പിച്ചും പ്രകോപിപ്പിച്ചും കീഴടക്കി. ഒറ്റയാൾ പട്ടാളം പോലെ എഡിറ്റർ ആഴ്ചപ്പതിപ്പിൽ നിറഞ്ഞു നിന്നു.
1924 ഓഗസ്റ്റ് 12-ന് സി. കേശവന്റെയും ശ്രീമതി വാസന്തിയുടെയും മകനായി തിരുവനന്തപുരത്ത് ജനനം. പഠിക്കാൻ സമർത്ഥനായ വിദ്യാർത്ഥിയായിരുന്നു. തിരുവനന്തപുരത്ത ആർട്‌സ് കോളേജിൽ ഇൻ്റർമീഡിയറ്റിനും മധുര അമേരിക്കൻ കോളെജിൽ ധനതത്ത്വശാസ്ത്രവും പഠിച്ചു. 1947-ൽ തിരുവനന്തപുരം ലോ കോളേജിൽ ചേർന്നു. തിരുവനന്തപുരത്തു പൊന്നറ ശ്രീധറിന്റെ അധ്യക്ഷതയിൽ ചേർന്ന ഒരു യോഗത്തിൽ “നെഹ്റുവിൻ്റെ ചോരത്തുള്ളികളിൽനിന്നും ആഞ്ഞടിക്കുന്ന കൊടുങ്കാറ്റിൽ ബ്രിട്ടീഷുകാരെ താങ്ങി നിർത്തുന്ന നാട്ടുരാജ്യങ്ങളിലെ കിരീടംവച്ച തലകൾ പറന്നുപോകും” എന്നു പ്രസംഗിച്ചതിന്റെ പേരിൽ ലോ കോളേജിൽനിന്നു പുറത്താക്കപ്പെട്ടു.
പന്ത്രണ്ടാം വയസിൽ പൊതുയോഗത്തിൽ പ്രസംഗിച്ചു തുടങ്ങിയ ആളാണ് ബാലകൃഷണൻ. ഇൻഡ്യൻ പാർലമെന്റിൽ വരെ എത്തിയ ആ പ്രസംഗങ്ങളിൽ അധികവും അച്ഛൻറെ പ്രസംഗങ്ങളെപ്പോലെ തന്നെ വിവാദങ്ങളുമായിരുന്നു. രണ്ടുപേരും രാഷ്ട്രീയമായി എതിർ ചേരിയിൽ ആയിരുന്നെന്ന് മാത്രം.
പുന്നപ്ര-വയലാർ കേസിലെ പ്രതികളെ മോചിപ്പിക്കാനായി നടത്തിയ ജയിൽ വിമോചനസമരത്തെ മുന്നിൽ നിന്ന് നയിക്കാനും ബാലകൃഷണനുണ്ടായിരുന്നു. കുറച്ചുകാലം കെ.എസ്.പി.യുടെ തിരുവിതാംകൂർ സ്റ്റേറ്റ് കമ്മിറ്റി സെക്രട്ടറിയായും പ്രവർത്തിച്ചു. രാഷ്ട്രീയത്തിൽ എന്നും അദ്ദേഹം എൻ.ശ്രീകണ്ഠൻ നായരുടെ അനുയായി ആയിരുന്നു. 1949-ൽ കേരളത്തിൽ റവല്യൂഷണറി സോഷ്യലിസ്റ്റ് പാർടിയുടെ രൂപീകരണത്തിൽ മുഖ്യപങ്കുവഹിച്ചു.
രാഷ്ട്രീയക്കാരനായ ബാലകൃഷ്ണനെ പിതാവ് സി കേശവൻ അംഗീകരിച്ചിരുന്നില്ല. എന്നാല്‍ എഴുത്തുകാരനും പത്രപ്രവര്‍ത്തകനുമായ ബാലകൃഷ്ണന്റെ പ്രാഗത്ഭ്യങ്ങള്‍ക്കുള്ള സി.കേശവന്റെ അംഗീകാരമാണ് അദ്ദേഹത്തിന്റെ ‘ജിവിതസമരം’ എന്ന ആത്മകഥയുടെ അവതാരിക ബാലകൃഷ്ണനെ കൊണ്ട് എഴുതിച്ചത്.
അനിയന്ത്രിതമായ മദ്യപാന ശീലം അദ്ദേഹത്തിൻ്റെ ആരോഗ്യം തകർത്തു. 1984 ജൂലായ് 16-ന് മസ്‌തിഷ്‌കജ്വരം ബാധിച്ച് കെ.ബാലകൃഷ്ണൻ അന്തരിച്ചു.
പ്രധാന കൃതികൾ: കാലയളവ് ഒരു വർഷം, മധുവിധു പ്രേമം, നിറമില്ലാത്ത മാരിവില്ല്, വിടരാത്ത പൂമൊട്ട്, ധൂമരശ്മി, സഹ്യാദ്രിസാനുക്കളിൽ, നനഞ്ഞുപോയി, എങ്കിലും ജ്വാല (ആത്മകഥ).
