Sat. Nov 21st, 2026

കല്ലാറെന്ന കൊച്ചുഗ്രാമത്തെ ഭാരതത്തിന്റെ നെറുകയില്‍ എത്തിച്ചിരിക്കുകയാണ് ലക്ഷമിക്കുട്ടിയമ്മയെന്ന 75 കാരി ആദിവാസി മാതാവ്. രാജ്യത്തെ നാലാമത്തെ പരമോന്നത ബഹുമതിയായ പത്മശ്രീ ഈ അമ്മയെ തേടിയെത്തിരിക്കുകയാണ്. അതും പരമ്പരാഗത നാടന്‍ ചികിത്സയിലുള്ള വൈദഗ്ദ്ധ്യത്തിന്. ആദിവാസി ഗോത്രസംസ്‌കാരത്തിന്റെ ചികിത്സാരീതികളാണ് ലക്ഷമിക്കുട്ടിയമ്മ പ്രയോഗിക്കുകയും രേഖപ്പെടുത്തുകയും ചെയ്യുന്നത്.

വിതുരക്കാര്‍ക്കും കല്ലാറുകാര്‍ക്കും പാലോടുകാര്‍ക്കും പൊന്മുടിക്കാര്‍ക്കുമൊക്കെ ലക്ഷമിക്കുട്ടിയമ്മയെ നേരത്തേ അറിയാം. അത്യാവശ്യം തിരുവനന്തപുരം ജില്ലയില്‍ നിന്നും അതുപോലെ മറ്റ് ജില്ലകളില്‍ നിന്നും അമ്മയുടെ കൈപ്പുണ്യത്തെപ്പറ്റി അറിഞ്ഞെത്തുന്നവര്‍ക്കും പരിചയം കാണും ഈ നാട്ടുവൈദ്യയെ,ഈ വിഷചികിത്സകയെ..പക്ഷെ ഒരു പത്മശ്രീ വേണ്ടി വന്നു ഈ വനമുത്തശ്ശിയെ മാലോകരറിയാന്‍.

പാമ്പുവിഷത്തിനും എട്ടുകാലി വിഷത്തിനും ചികിത്സിക്കുന്ന വിഷചികിത്സക. അഞ്ഞൂറിലധികം പച്ചമരുന്നുകളെപ്പറ്റിയും അവയുടെ വൈദ്യസംബന്ധിയായ ഉപയോഗത്തെപ്പറ്റിയുമുള്ള ആധികാരികമായ അറിവ്. കൊടിഞ്ഞി തലവേദനമുതലുള്ള രോഗങ്ങള്‍ക്കുള്ള ഒറ്റമൂലി അമ്മയുടെ കൈയ്യിലുണ്ട്. കുടിലിന് ചുറ്റും പരമ്പരാഗത ഔഷധസസ്യങ്ങള്‍ നട്ടുവളര്‍ത്തുന്നുണ്ട് ലക്ഷമിക്കുട്ടിയമ്മ.

പാലോട് ഫോറസ്റ്റ് റേഞ്ചില്‍,പൊന്മുടിയിലേക്ക് കടക്കുന്ന കവാടം പോലെ,പ്രകൃതിയാല്‍ മനോഹരമാക്കിയ കാടിനോട് ചേര്‍ന്ന് കിടക്കുന്ന ചെറിയ ഗ്രാമമാണ് കല്ലാര്‍. കല്ലാറില്‍ നിന്ന് കാട്ടുപാതയിലേക്ക് തിരിഞ്ഞാല്‍ മൊട്ടമൂട്ടിലെ അമ്മയുടെ കുടിലിലെത്താം. ഇവിടെ തനിച്ചാണ് ലക്ഷമിക്കുട്ടിയമ്മ. ഭര്‍ത്താവ് രണ്ട് വര്‍ഷം മുമ്പ് മരിച്ചു. മൂന്ന് ആണ്‍മക്കളില്‍ ഒരാളെ കാട്ടാന ആക്രമിച്ച് കൊലപ്പെടുത്തി. മറ്റൊരു മകന്‍ വിഷംതീണ്ടി മരിച്ചു. അവശേഷിക്കുന്ന മകന്‍ റെയില്‍വേയിലെ ഉദ്യോഗസ്ഥനാണ്.