Mon. Nov 23rd, 2026

ന്യൂഡൽഹി: അന്ധവിശ്വാസങ്ങൾക്കും അനാചാരങ്ങൾക്കുമെതിരെ പൊരുതി ഹിന്ദുത്വ ഫാസിസ്റ്റുകളുടെ വെടിയേറ്റ് മരിച്ച ​ഡോ. നരേന്ദ്ര ധബോൽക്കറിന്റെ 13-ാം രക്തസാക്ഷിദിനം ആചരിക്കാനിരിക്കെ രണ്ടാമത്തെ പ്രതിയും പുറത്തിറങ്ങുന്നു. യുക്തിവാദിയും സാമൂഹ്യപ്രവർത്തകനുമായ നരേന്ദ്ര ധബോൽക്കറെ വധിച്ച കേസിൽ വിചാരണക്കോടതി വിധിച്ച ജീവപര്യന്തം ശിക്ഷ മരവിപ്പിച്ച് ഒന്നാം പ്രതിക്ക് ജാമ്യം നൽകി ബോംബെ ഹൈക്കോടതി.

​ജയിലിൽ കഴിയുന്ന തീവ്രഹിന്ദുത്വവാദി സച്ചിൻ പ്രകാശ്റാവു അന്ദുരെയുടെ ശിക്ഷയാണ് ജസ്റ്റിസുമാരായ എസ്. വി. കോട്‌വാൾ, ആർ. ആർ. ഭോൺസാലെ എന്നിവരുടെ ബെഞ്ച് മരവിപ്പിച്ചത്. ഇതേ കേസിൽ കുറ്റസമ്മതം നടത്തിയ ശരദ് കലാസ്കർ എന്ന പ്രതിക്കും ജാമ്യം ലഭിച്ചിരുന്നു.

​സിബിഐ നടത്തിയ അന്വേഷണത്തിലെ ദൗർബല്യങ്ങൾ ചൂണ്ടിക്കാട്ടിയാണ് പ്രതികൾക്ക് വലിയ ആശ്വാസമാണെന്ന് കോടതി വിലയിരുത്തിയത്. ഇരുവരുടെയും തടവ് ചോദ്യംചെയ്ത് സച്ചിൻ പ്രകാശ്റാവു നൽകിയ അപ്പീലിൽ തീർപ്പാകുംവരെ ജാമ്യം തുടരും.

​തീവ്രഹിന്ദുത്വ സംഘടനയായ സനാതൻ സൻസ്ഥ പ്രവർത്തകരായ സച്ചിൻ പ്രകാശ്റാവുവിനെയും ശരദ് കലാസ്കറെയും 2024-ലാണ് പൂനെ വിചാരണക്കോടതി ജീവപര്യന്തം തടവിന് ശിക്ഷിച്ചത്. അഞ്ചുലക്ഷം രൂപ പിഴയും വിധിച്ചിരുന്നു.

​വ്യാഴാഴ്ച ധബോൽക്കറുടെ പതിമൂന്നാം രക്തസാക്ഷിദിനം ആചരിക്കാനിരിക്കെയാണ് രണ്ടാമത്തെ പ്രതിയും പുറത്തിറങ്ങുന്നത്. രണ്ടുപേർക്കും പോലും കാര്യമായി ശിക്ഷ അനുഭവിച്ചിട്ടില്ല. 2013 ഓഗസ്റ്റ് 20-ന് പ്രഭാതനടത്തത്തിനിടെ പൂനെയിലെ വഴിയിൽ വെച്ച് ധബോൽക്കറെ വെടിവെച്ച് കൊലപ്പെടുത്തുകയായിരുന്നു.

ഇന്ത്യന്‍ ഫാസിസത്തിന്റെ വെടിയുണ്ടകളിൽ തലയ്ക്കും നെഞ്ചിനും വെടിയേറ്റു വീണ ധബോല്‍ക്കര്‍, ഇതുവരെ എഴുതപ്പെടാത്ത ഇന്ത്യയിലെ ആദ്യത്തെ ബൗദ്ധിക രക്തസാക്ഷിയാണ്. യുക്തിചിന്തയെ തകര്‍ക്കുക, മസ്തിഷ്‌കത്തെ മരവിപ്പിക്കുക എന്നീ ആസൂത്രിത അജണ്ടകളോടു കൂടിയ ആദ്യത്തെ കൊലപാതകമാണ് 2013 ആഗസ്ത് 20-ന് അടയാളപ്പെടുത്തപ്പെട്ടത്. ഈ വിധിയോടെ ഹിന്ദുത്വ തീവ്രവാദത്തിന് കോടതികളും വളം വച്ചുകൊടുക്കുന്നു എന്ന ആരോപണം ബലപ്പെടുകയാണ്.