ചെന്നൈ: ദക്ഷിണേന്ത്യയുടെ രാഷ്ട്രീയ ഭാവിയെത്തന്നെ ആശങ്കയിലാഴ്ത്തിക്കൊണ്ട് കേന്ദ്ര സർക്കാരിന്റെ മണ്ഡല പുനർനിർണയ നീക്കങ്ങൾക്കെതിരെ ശക്തമായ പ്രതിരോധവുമായി തമിഴ്‌നാട് രംഗത്ത്. സംസ്ഥാനത്തിന് യാതൊരുവിധത്തിലും ഗുണം ചെയ്യില്ലെന്ന് വ്യക്തമാക്കിക്കൊണ്ട് മുഖ്യമന്ത്രി വിജയ് ശനിയാഴ്ച സംസ്ഥാനത്തെ എം.പിമാരുടെ നിർണായക യോഗം വിളിച്ചുചേർത്തു. തമിഴ്‌നാടിന്റെ പാർലമെന്ററി പ്രാതിനിധ്യത്തെ ബാധിക്കുന്ന ജനസംഖ്യാധിഷ്ഠിത മണ്ഡല പുനർനിർണയത്തെ ശക്തമായി എതിർക്കണമെന്ന ഒറ്റക്കെട്ടായ തീരുമാനമാണ് യോഗത്തിൽ ഉയർന്നു വന്നിരിക്കുന്നത്.
എന്നാൽ ഏറെ രാഷ്ട്രീയ പ്രാധാന്യമുള്ള ഈ സർവകക്ഷി യോഗത്തിൽ നിന്ന് സംസ്ഥാനത്തെ പ്രമുഖ പാർട്ടികളായ ഡി.എം.കെയും എ.ഐ.എ.ഡി.എം.കെയും വിട്ടുനിന്നത് വലിയ ചർച്ചയായിട്ടുണ്ട്. അതേസമയം, കോൺഗ്രസ്, വി.സി.കെ, സി.പി.ഐ, സി.പി.ഐ.എം, എം.ഡി.എം.കെ, ഐ.യു.എം.എൽ എന്നീ കക്ഷികളിൽ നിന്നുള്ള ലോക്‌സഭ, രാജ്യസഭ അംഗങ്ങളായ 21 ഓളം ജനപ്രതിനിധികൾ യോഗത്തിൽ സജീവമായി പങ്കെടുത്തു. രാഷ്ട്രീയ വ്യത്യാസങ്ങൾ മാറ്റിവെച്ച് തമിഴ്‌നാടിന്റെ അവകാശങ്ങൾക്കായി എല്ലാവരും ഒറ്റക്കെട്ടായി ശബ്ദമുയർത്തണമെന്ന് കോൺഗ്രസ് ലോക്‌സഭാ എം.പി കാർത്തി ചിദംബരം അഭ്യർത്ഥിച്ചു. പാർലമെന്റ് സീറ്റുകൾ 543 ആയി പരിമിതപ്പെടുത്തണമെന്നും, 39 അംഗങ്ങളുള്ള തമിഴ്‌നാടിന്റെ സീറ്റ് വിഹിതത്തിൽ യാതൊരു കുറവും വരുത്താൻ പാടില്ലെന്നുമാണ് യോഗത്തിന്റെ പൊതുവായ നിലപാട്.
യോഗത്തിൽ നിന്ന് ഡി.എം.കെയും എ.ഐ.എ.ഡി.എം.കെയും വിട്ടുനിന്നതിനെ കോൺഗ്രസ് എം.പിമാരായ പ്രവീൺ ചക്രവർത്തിയും വിഷ്ണു പ്രസാദും രൂക്ഷമായി വിമർശിച്ചു. മുൻപ് പലതവണ സംസ്ഥാനം ഭരിച്ച പാർട്ടികൾ ഇത്തരം നിർണ്ണായകമായ ജനകീയ വിഷയത്തിൽ നിന്നും വിട്ടുനിന്നത് നിരാശാജനകമാണെന്ന് അവർ ചൂണ്ടിക്കാട്ടി. നീതിയുക്തമായ പുനർനിർണയം എന്നൊന്നില്ലെന്നും, ആകെ സീറ്റുകളുടെ എണ്ണത്തിലോ തമിഴ്‌നാടിന്റെ വിഹിതത്തിലോ മാറ്റം വരുത്താതെ പുനർനിർണയം പൂർണ്ണമായും ഒഴിവാക്കുക എന്നത് മാത്രമാണ് ഏക പോംവഴിയെന്നും പ്രവീൺ ചക്രവർത്തി വ്യക്തമാക്കി. സർക്കാരിന്റെ ഈ നീക്കത്തിന് വ്യക്തമായ അജണ്ടയില്ലെന്ന് ആരോപിച്ചാണ് ഡി.എം.കെയും മറ്റ് കക്ഷികളും യോഗം ബഹിഷ്കരിച്ചത്.
ജനസംഖ്യാടിസ്ഥാനത്തിലുള്ള പുനർനിർണയം പാർലമെന്റിലെ ദക്ഷിണേന്ത്യൻ സംസ്ഥാനങ്ങളുടെ പ്രാതിനിധ്യം വൻതോതിൽ കുറയ്ക്കുമെന്ന ആശങ്ക ശക്തമാകുന്നതിനിടയിലാണ് തമിഴ്‌നാട്ടിൽ ഈ നിർണ്ണായക നീക്കം ഉണ്ടായിരിക്കുന്നത്. കേന്ദ്ര സർക്കാരിന്റെ പുതിയ കണക്കുകൂട്ടലുകൾക്കെതിരെ പ്രാദേശിക പാർട്ടികൾക്കിടയിൽ അഭിപ്രായവ്യത്യാനങ്ങൾ നിലനിൽക്കുമ്പോഴും, തമിഴ്‌നാടിന്റെ അവകാശങ്ങൾ സംരക്ഷിക്കാൻ ഒറ്റക്കെട്ടായി മുന്നോട്ട് പോകാനാണ് യോഗത്തിൽ പങ്കെടുത്തവരുടെ തീരുമാനം.
