Fri. Nov 20th, 2026

ചെന്നൈ: തമിഴ്‌നാട് മുഖ്യമന്ത്രിയും തമിഴക വെട്രി കഴകം നേതാവുമായ ജോസഫ് വിജയ്‌ക്കെതിരെ ഗവർണർ രാജേന്ദ്ര ആർലേക്കർക്ക് പരാതി നൽകി ബിജെപി. ഔദ്യോഗിക കാബിനറ്റ് യോഗത്തിൽ മന്ത്രിമാരല്ലാത്ത പുറത്തുനിന്നുള്ള വ്യക്തികൾ പങ്കെടുത്തുവെന്ന് ആരോപിച്ചാണ് ബിജെപി നേതാവ് നൈനാർ നാഗേന്ദ്രൻ ഗവർണറെ സമീപിച്ചത്. വിജയ്‌യുടെ വ്യക്തിപരമായ ഉപദേശകൻ ജോൺ ആരോഗ്യസാമിയും സുഹൃത്ത് വിഷ്ണു റെഡ്ഡിയും കാബിനറ്റ് യോഗത്തിൽ പങ്കെടുത്തത് നിയമവിരുദ്ധമാണെന്നും ഇത് വഴി മുഖ്യമന്ത്രി ഗുരുതരമായ സത്യപ്രതിജ്ഞാ ലംഘനമാണ് നടത്തിയതെന്നും ബിജെപി ആരോപിക്കുന്നു. മുഖ്യമന്ത്രിയെ ഗവർണർ അടിയന്തരമായി വിളിപ്പിച്ചു താക്കീത് നൽകണമെന്നും ബിജെപി തങ്ങളുടെ നിവേദനത്തിലൂടെ ആവശ്യപ്പെട്ടിട്ടുണ്ട്. രാജ്ഭവൻ ഈ പരാതി ഔദ്യോഗികമായി പുറത്തുവിട്ടതോടെ തമിഴ്നാട് രാഷ്ട്രീയം ചൂടുപിടിക്കുകയാണ്.

മുഖ്യമന്ത്രിയുടെ ഓഫീസിനോട് ചേർന്ന് ജോണിനും വിഷ്ണുവിനും പ്രത്യേക ചേമ്പർ അനുവദിച്ചിട്ടുണ്ടെന്നും, ക്യാബിനറ്റ് പദവിയോടെ ഇവരെ വിജയ്‌യുടെ ഉപദേശകരായി നിയമിച്ചുവെന്നും റിപ്പോർട്ടുകളുണ്ട്. എന്നാൽ ഇത് സംബന്ധിച്ച സർക്കാർ ഉത്തരവുകൾ ഇതുവരെ പരസ്യപ്പെടുത്തിയിട്ടില്ലാത്തതാണ് ഇപ്പോൾ വലിയ വിവാദങ്ങൾക്ക് വഴിവെച്ചിരിക്കുന്നത്. ഇതിനിടെ, ഭരണപക്ഷമായ ഡിഎംകെയും വിജയ്‌ക്കെതിരെ കടുത്ത നീക്കങ്ങളുമായി ഗവർണറെ കാണാനുള്ള തയ്യാറെടുപ്പിലാണ്. വിജയ്‌യുടെ പാർട്ടി രാഷ്ട്രീയത്തിൽ കുതിരക്കച്ചവടം നടത്തുന്നു എന്ന് കാണിച്ച് ഡിഎംകെയും ഉടൻ തന്നെ ഗവർണർക്ക് ഔദ്യോഗിക പരാതി നൽകുമെന്നാണ് വിവരം. ഇതോടെ വരും ദിവസങ്ങളിൽ തമിഴ്‌നാട്ടിൽ ഭരണ-പ്രതിപക്ഷ പോരാട്ടം കൂടുതൽ ശക്തമാകുമെന്ന് ഉറപ്പായി.