കണ്ണൂര്: നിര്മാണത്തിലിരിക്കുന്ന വീട്ടിനുള്ളില് വീട്ടുടമ വെടിയേറ്റുമരിച്ചു. കണ്ണൂര് കൈതപ്രത്താണ് ഗുഡ്സ് ഓട്ടോ ഡ്രൈവര് രാധാകൃഷ്ണന് വെടിയേറ്റു മരിച്ചത്. രാധാകൃഷ്ണന്റെ നിര്മാണത്തിലിരിക്കുന്ന വീട്ടില് വച്ച് പെരുമ്പടവ് സ്വദേശി സന്തോഷാണ് വെടിയുതിര്ത്തതെന്നാണ് പോലീസ് പറയുന്നത്. നിര്മാണ കരാറുകാരനായ സന്തോഷിന് തോക്ക് ലൈസന്സ് ഉണ്ടെന്നു വ്യക്തമായിട്ടുണ്ട്.
കൊലപാതകത്തിന് മുമ്പ് പ്രതി സന്തോഷ് ഫേസ്ബുക്കില് കൂടി ഭീഷണി സന്ദേശം പോസ്റ്റ് ചെയ്തിരുന്നു. വ്യക്തിപരമായ കാരണമായിരുന്നു കൊലപാതകത്തിലേക്ക് നയിച്ചതെന്നാണ് ലഭിക്കുന്ന വിവരം. വെടിവെച്ചു കൊലപ്പെടുത്തുന്നതിന് മുമ്പ് സന്തോഷ് തോക്കേന്തിയ ചിത്രവും ഭീഷണി സന്ദേശവും ഫേസ്ബുക്കില് പങ്കുവെച്ചിരുന്നു. ഇതില് കൊല്ലുമെന്ന രീതിയിലുള്ള കുറിപ്പുകളായിരുന്നു.
കൊല്ലപ്പെട്ട രാധാകൃഷ്ണന്റെ സ്വദേശം ഇരിക്കൂര് കല്യാട്ട് ആണ്. കഴിഞ്ഞ കുറേ കാലമായി കൈതപ്രത്തായിരുന്നു ഇയാള് താമസിച്ചു വരുന്നത്. ഇവിടെയാണ് പുതിയ വീട് നിര്മ്മിക്കുന്നതും. പ്രതി സന്തോഷ് ഇവിടെ എത്തിയത് മദ്യപിച്ചാണെന്നാണ് വിവരം. സംഭവസ്ഥലത്ത് നിന്ന് മദ്യക്കുപ്പിയും പോലീസ് കണ്ടെടുത്തിട്ടുണ്ട്. എന്താണ് കൊലപാതകത്തിലേക്ക് നയിച്ച കാരണം എന്നു വ്യക്തമായിട്ടില്ല. വെടിയൊച്ച കേട്ടതായി സമീപവാസികള് പോലീസിനു മൊഴി നല്കി.
തോക്ക് ചൂണ്ടി സന്തോഷ്; രാധാകൃഷ്ണനെ കൊല്ലുന്നതിന് മുന്പും ശേഷവും എഫ്ബി പോസ്റ്റ്:
കണ്ണൂര് കൈതപ്രത്ത് 49കാരനെ കൊലപ്പെടുത്തിയത് ആസൂത്രിതമായി. കൈതപ്രത്ത് വാടകയ്ക്ക് താമസിക്കുന്ന രാധാകൃഷ്ണനെ പെരുമ്പടവ് സ്വദേശി സന്തോഷ് ആണ് കൊലപ്പെടുത്തിയത്. കൊല നടത്തുന്നതിന് തൊട്ടുമുന്പ് തോക്ക് പിടിച്ചുള്ള ഒരു ചിത്രം സന്തോഷ് ഫേസ്ബുക്കില് പങ്കുവെച്ചു. 4.27 ഓടെയായിരുന്നു ഇയാള് ചിത്രം പങ്കുവെച്ചത്. ‘കൊള്ളിക്കുക എന്നതാണ് ടാസ്ക്, കൊള്ളും എന്നത് ഉറപ്പ്’എന്നായിരുന്നു സന്തോഷ് ചിത്രത്തിന് നല്കിയ ക്യാപ്ഷന്.
കൊലപാതകത്തിന് ശേഷവും സന്തോഷ് ഫേസ്ബുക്കില് ഒരു പോസ്റ്റ് പങ്കുവെച്ചു. ഈ പോസ്റ്റിന് താഴെ ചിലര് കൊല്ലപ്പെട്ട രാധാകൃഷ്ണന്റെ ചിത്രം കമന്റായി പങ്കുവെച്ചിട്ടുണ്ട്. തോക്ക് ഉപയോഗിക്കുന്നതില് പരിശീലനം നേടിയ ആളാണ് സന്തോഷ് എന്നാണ് വിവരം.
ഇന്ന് വൈകിട്ട് ഏഴ് മണിക്ക് ശേഷമാണ് കൊലപാതകം നടന്നതെന്നാണ് വിവരം. രാധാകൃഷ്ണന്റെ നിര്മാണ പ്രവര്ത്തനങ്ങള് നടക്കുന്ന വീട്ടില് എത്തി സന്തോഷ് വെടിയുതിര്ത്തുകയായിരുന്നു. ശബ്ദം കേട്ട് ഓടിയെത്തിയ നാട്ടുകാര് ഉടന് തന്നെ രാധാകൃഷ്ണനെ പരിയാരം മെഡിക്കല് കോളേജ് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. നാട്ടുകാര് അറിയിച്ചതിനെ തുടര്ന്ന് പൊലീസ് സ്ഥലത്തെത്തുകയും സന്തോഷിനെ പിടികൂടുകയുമായിരുന്നു.
കല്യാട് സ്വദേശിയായ രാധാകൃഷ്ണന് ഗുഡ്സ് ഡ്രൈവറാണ്. വര്ഷങ്ങളായി കൈതപ്രത്ത് വാടകയ്ക്ക് താമസിച്ചുവരികയായിരുന്നു. രാധാകൃഷ്ണന്റെ കുടുംബവും സന്തോഷിന്റെ കുടുംബവും പരിചയക്കാരാണ്. ഇതിന് പുറമേ രാധാകൃഷ്ണന്റെ ഭാര്യയും സന്തോഷും ക്ലാസ്മേറ്റ്സുമാണ്. നേരത്തെ ഭാര്യയും സന്തോഷുമായുള്ള പരിചയത്തെ രാധാകൃഷ്ണന് ചോദ്യം ചെയ്തിരുന്നതായി വിവരം പുറത്തുവരുന്നുണ്ട്.


