Sun. Nov 22nd, 2026

മമ്മൂട്ടിയുടെ ഗെയിം ത്രില്ലർ ചിത്രം’ബസൂക്ക’യ്ക്ക് വേണ്ടി ആരാധകർ വളരെ പ്രതീക്ഷയോടെയാണ് കാത്തിരിക്കുന്നത്. കലൂർ ഡെന്നീസിന്റെ മകൻ ഡിനോ ഡെന്നിസ് ആദ്യമായി സംവിധാനം ചെയ്യുന്ന ചിത്രമാണിത്. പലയാവർത്തി റിലീസ് മാറ്റിവെച്ച സിനിമ ഈ ഫെബ്രുവരി 14 ന് തിയേറ്ററുകളിലെത്തുമെന്നായിരുന്നു അണിയറപ്രവർത്തകർ അറിയിച്ചിരുന്നത്. എന്നാൽ ഇപ്പോൾ ആരാധകരെ നിരാശയിലാഴ്ത്തുന്ന വിവരമാണ് പുറത്തുവരുന്നത്.

സിനിമയുടെ റിലീസ് നീട്ടിയേക്കുമെന്ന റിപ്പോർട്ടുകളാണ് വരുന്നത്. സിജിഐ വർക്കുകൾ പൂർത്തിയാകാത്തത് മൂലമാണ് സിനിമയുടെ റിലീസ് നീട്ടുന്നത് എന്നാണ് ഒടിടി പ്ലേ റിപ്പോർട്ട് ചെയ്യുന്നത്. ഏപ്രിൽ 10 ന് വിഷു റിലീസായാകും സിനിമ എത്തുക എന്നാണ് സൂചന.

പ്രശസ്ത തമിഴ് സംവിധായകനും നടനുമായ ഗൗതം വാസുദേവ് മേനോൻ നിർണ്ണായക കഥാപാത്രത്തെ അവതരിപ്പിക്കുന്ന ചിത്രത്തിൽ സിദ്ധാർത്ഥ് ഭരതൻ, ബാബു ആൻ്റണി, ഹക്കീം ഷാജഹാൻ, ഭാമ അരുൺ, ഡീൻ ഡെന്നിസ്, സുമിത് നേവൽ, ദിവ്യ പിള്ള, സ്ഫടികം ജോർജ് എന്നിവരാണ് മറ്റ് പ്രധാന താരങ്ങൾ. കാപ്പ, അന്വേഷിപ്പിൻ കണ്ടെത്തും എന്നിവക്ക് ശേഷം സരിഗമയും തീയേറ്റർ ഓഫ് ഡ്രീംസും ചേർന്ന് നിർമ്മിക്കുന്ന ചിത്രമാണ് ബസൂക്ക.