കോഴിക്കോട്: സാഹിത്യകാരി പി. വത്സല(85) അന്തരിച്ചു. കോഴിക്കോട് മുക്കം കെഎംസിടി മെഡിക്കല് കോളജില് ഹൃദയാഘാതത്തെ തുടര്ന്നാണ് അന്ത്യം. കേരള സാഹിത്യ അക്കാദമി അധ്യക്ഷയായിരുന്നു. കേരള സാഹിത്യ അക്കാദമി അവാര്ഡ്, എഴുത്തച്ഛന് പുരസ്കാരം, മുട്ടത്തുവര്ക്കി അവാര്ഡ്, സി വി കുഞ്ഞിരാമന് സ്മാരക അവാര്ഡ് തുടങ്ങി നിരവധി പുരസ്കാരങ്ങള് ലഭിച്ചിട്ടുണ്ട്.
‘നെല്ല്’ ആണ് ആദ്യ നോവല്. നിഴലുറങ്ങുന്ന വഴികള്, നെല്ല്, ആഗ്നേയം, അരക്കില്ലം, ഗൗതമന്, പാളയം, ചാവേര്, കൂമന്കൊല്ലി, നമ്പറുകള്, വിലാപം, പഴയപുതിയ നഗരം, ആനവേട്ടക്കാരന്, അനുപമയുടെ കാവല്ക്കാരന്, ഉണിക്കോരന് ചതോപാധ്യായ, ഉച്ചയുടെ നിഴല്, കറുത്ത മഴപെയ്യുന്ന താഴ്വര, തകര്ച്ച എന്നിവയാണ് പ്രധാനകൃതികള്. നിഴലുറങ്ങുന്ന വഴികള് എന്ന നോവലിനായിരുന്നു സാഹിത്യ അക്കാദമി അവാര്ഡ്. 1938ല് ഏപ്രില് നാലിന് കാനങ്ങോട്ട് ചന്തുവിന്റെയും പത്മാതിയുടെയും മകളായി കോഴിക്കോട്ടാണ് പി വത്സലയുടെ ജനനം.
കാഞ്ഞിരത്തിങ്കൽ എൽപി സ്കൂൾ, നടക്കാവ് ഗേൾസ് ഹൈസ്കൂൾ എന്നിവിടങ്ങളിൽ പഠനം. അധ്യാപന കാലത്താണ് അപ്പുക്കുട്ടിയെ പരിചയപ്പെടുന്നത്. വിവാഹശേഷം ദമ്പതികൾ വയനാട്ടിലേക്ക് താമസം മാറ്റി. അവിടെ താമസിച്ചിരുന്ന ആദിവാസി സമൂഹങ്ങളുടെ കഥ പറയുന്ന നിരൂപക പ്രശംസ നേടിയ ‘നെല്ല്’ എന്ന കൃതിയുടെ പശ്ചാത്തലമായിരുന്നു അത്. പിന്നീട് രാമു കാര്യാട്ട് ‘നെല്ല്’ സിനിമയാക്കിയപ്പോൾ വത്സല തിരക്കഥയെഴുതി.
സാഹിത്യ അക്കാദമിയുടെ ചെയർപേഴ്സണായി സേവനമനുഷ്ഠിച്ച അവർ ഇടതുപക്ഷ സാംസ്കാരിക സംഘടനയായ പുരോഗമന കലാ സാഹിത്യ സംഘം പ്രവർത്തക ആയിരുന്നു. കോഴിക്കോട് മുക്കം കെഎംസിടി മെഡിക്കൽ കോളേജിൽ പ്രവേശിപ്പിച്ചിരിക്കെയാണ് അന്ത്യം. ഭർത്താവ് മാറോളി അപ്പുക്കുട്ടിക്കൊപ്പം മുക്കത്തിനടുത്ത് അഗസ്ത്യമുഴിയിൽ മകൾ എം.എ.മിനിയുടെ വീട്ടിലായിരുന്നു താമസം.


