തിരുവനന്തപുരം: 2022ലെ സംസ്ഥാന സര്ക്കാരിന്റെ വനിതാരത്ന പുരസ്കാരങ്ങള് പ്രഖ്യാപിച്ചു. ആരോഗ്യവകുപ്പ് മന്ത്രി വീണാ ജോര്ജ് ആണ് പുരസ്കാര ജേതാക്കളെ പ്രഖ്യാപിച്ചത്.
കായിക മേഖലയില് കെ സി ലേഖ, പ്രതികൂല സാഹചര്യങ്ങളെ അതിജീവിച്ച് ജീവിത വിജയം നേടിയ വനിതാ വിഭാഗത്തില് നിലമ്പൂര് ആയിഷ, സ്ത്രീകളുടെയും കുട്ടികളുടെയും ശാക്തീകരണത്തില് ലക്ഷ്മി എന്. മേനോന്, വിദ്യാഭ്യാസ മേഖലയിലും ശാസ്ത്ര സാങ്കേതിക മേഖലയിലും വ്യക്തി മുദ്ര പതിപ്പിച്ച വനിതയായി കോട്ടയം ഗവ. മെഡിക്കല് കോളേജ് സര്ജിക്കല് ഗാസ്ട്രോഎന്ട്രോളജി വിഭാഗം അസോസിയേറ്റ് പ്രൊഫസര് ഡോ. ആര് എസ് സിന്ധു എന്നിവരെ തെരഞ്ഞെടുത്തു.
നാളെ വൈകുന്നേരം നാലിന് തിരുവനന്തപുരം നിശാഗന്ധി ആഡിറ്റോറിയത്തില് സംഘടിപ്പിക്കുന്ന അന്താരാഷ്ട്ര വനിതാദിനാഘോഷം സംസ്ഥാനതല ഉദ്ഘാടനത്തോടനുബന്ധിച്ച് മുഖ്യമന്ത്രി പിണറായി വിജയന് പുരസ്കാരങ്ങള് വിതരണം ചെയ്യും.


