Fri. Nov 20th, 2026

പരാജയം വിജയത്തിന്റെ മുന്നോടിയാണെന്ന് രാജ്യസഭാ ഡെപ്യൂട്ടി ചെയർമാൻ തിരഞ്ഞെടുപ്പിലേറ്റ പരാജയത്തിൽ കോൺഗ്രസിനെ ട്രോളി അഭിഭാഷകനും രാഷ്ട്രീയ നിരീക്ഷകനുമായ അഡ്വ.ജയശങ്കർ. നരേന്ദ്രമോദിയെ ആലിംഗനം ചെയ്ത രാഹുൽഗാന്ധിക്ക് അരവിന്ദ് കേജ്രിവാളിനെ ഒന്നു ഫോണിൽ വിളിച്ച് വോട്ട് ചോദിക്കാൻ മനസുതോന്നിയില്ലെന്ന് ജയശങ്കർ ഫേസ്ബുക്കിൽ കുറിച്ചു.ഭരണപക്ഷത്തേക്കാൾ അംഗബലം ഉണ്ടായിട്ടും കോൺഗ്രസ് സ്ഥാനാർഥിക്ക് രാജ്യസഭാ ഉപാധ്യക്ഷനാകാൻ കഴിയാത്തത് കൊട്ടി ഘോഷിക്കപ്പെട്ട പ്രതിപക്ഷ ഐക്യത്തിന്റെ പാളിച്ചയാണെന്ന് ജയശങ്കർ കൂട്ടിച്ചേർത്തു.

ബുക്ക് പോസ്റ്റിന്റെ പൂർണരൂപം

നരേന്ദ്രമോദിയെ ആലിംഗനം ചെയ്ത രാഹുൽഗാന്ധി അരവിന്ദ് കേജ്രിവാളിനെ ഒന്നു ഫോണിൽ വിളിച്ച് വോട്ട് ചോദിച്ചില്ല. ഫലം- ആം ആദ്മി പാർട്ടി വോട്ടെടുപ്പിൽ നിന്ന് വിട്ടുനിന്നു. വൈ.എസ്.ആർ കോൺഗ്രസും പി.ഡി.പിയും അതേ പാത പിന്തുടർന്നു. ബിജു ജനതാദളും തെലങ്കാന രാഷ്ട്രസമിതിയും പ്രതിഭാഗം ചേർന്നു. (അണ്ണാ ഡി.എം.കെ പണ്ടേ അപ്പുറത്താണ്)

ചുരുക്കിപ്പറഞ്ഞാൽ പ്രതിപക്ഷ ഐക്യം പാളി. ഭരണപക്ഷത്തേക്കാൾ അംഗബലം ഉണ്ടായിട്ടും കോൺഗ്രസ് സ്ഥാനാർഥിക്ക് രാജ്യസഭാ ഉപാധ്യക്ഷനാകാൻ കഴിഞ്ഞില്ല.

കൃത്യസമയത്ത് ഒരു സ്ഥാനാർഥിയെ കണ്ടുപിടിക്കാൻ പോലും ബുദ്ധിമുട്ടി. സഖ്യകക്ഷികളാരും മത്സരിക്കാൻ കൂട്ടാക്കിയില്ല. ഒടുവിൽ കോൺഗ്രസ് തന്നെ മുൾക്കിരീടം പേറേണ്ടിവന്നു.

രാജ്യസഭാ ഡെപ്പിടി ചെയർമാന്റേത് വെറും ആലങ്കാരിക പദവി ആണെന്നു കരുതി സമാധാനിക്കാം. പരാജയം വിജയത്തിന്റെ മുന്നോടിയാണ്. ഐക്യം ഐക്യം സിന്ദാബാദ്.