Sat. Nov 21st, 2026

ഓം അമൃതേശ്വരിയേ നമഃ പാലക്കാട്ടെ അമൃത വിദ്യാലയത്തില്‍ പ്ലസ് വണ്‍ പ്രവേശനത്തിന് കോഴ. പത്താം ക്ലാസ് പരീക്ഷ നടക്കുമ്പോള്‍ തന്നെ പണം വാങ്ങി പ്ലസ് വണ്‍ സീറ്റ് ഉറപ്പിക്കാന്‍ ഒരുങ്ങുകയാണ് സ്‌കൂള്‍ മാനേജ്‌മെന്റ്. സിബിഎസ്ഇ പരീക്ഷാഫലം വരുന്നതിന് മുമ്പു തന്നെ പതിനയ്യായിരം മുതല്‍ പതിനെട്ടായിരം രൂപ വരെ ഫീസ് വാങ്ങിയാണ് സ്‌കൂള്‍ മാനേജ്‌മെന്റ് അഡ്മിഷന്‍ നടത്തിയത്. കുട്ടി തോറ്റാലോ മാര്‍ക്ക് കുറഞ്ഞാലോ വാങ്ങിയ പണം തിരികെ നല്‍കില്ലെന്ന് മനേജ്‌മെന്റ് സര്‍ക്കുലര്‍ കൂടി ഇറക്കിയതോടെ ആശങ്കയിലാണ് വിദ്യാര്‍ത്ഥികളും രക്ഷിതാക്കളും. ഏഷ്യാനെറ്റ് ന്യൂസാണ് വാർത്ത പുറത്തുവിട്ടത്.

സിബിഎസ്ഇ പത്താം ക്ലാസ് പരീക്ഷയുടെ അവസാന ദിവസമാണ് കല്ലേക്കാട് അമൃത വിദ്യാലയം വിദ്യാര്‍ത്ഥികളില്‍ നിന്ന് നിര്‍ബന്ധിതമായി പ്ലസ് വണ്‍ അപേക്ഷ ഫോറം പൂരിപ്പിച്ചു വാങ്ങിയത്. പരിമിതമായ സീറ്റുകളാണ് ഉള്ളതെന്നും ഉടനെ അപേക്ഷിക്കുന്നവര്‍ക്ക് അവിടെ തന്നെ പഠിക്കാമെന്നും അതിനാല്‍ അപേക്ഷ പൂരിപ്പിച്ചു നല്‍കണമെന്നും പറഞ്ഞാണ് സ്‌കൂള്‍ അധികൃതര്‍ നിര്‍ബന്ധമായി ഫോം പൂരിപ്പിച്ച് വാങ്ങിയത്. മറ്റൊരു സ്‌കൂളില്‍ സീറ്റ് കിട്ടിയില്ലെങ്കിലോ എന്ന ഭയം മൂലം ആദ്യ ടേം ഫീസടക്കം 16000 രൂപ മുന്‍കൂര്‍ നല്‍കാന്‍ രക്ഷിതാക്കള്‍ നിര്‍ബന്ധിതരായി.

പരീക്ഷ ദിവസങ്ങളില്‍ കുട്ടികളെ സമ്മര്‍ദ്ദത്തിലാക്കിയ സ്‌കൂള്‍ അധികൃതരുടെ നടപടിയെ രക്ഷിതാക്കളില്‍ ചിലര്‍ ചോദ്യം ചെയ്‌തെങ്കിലും വാങ്ങിയ പണം തിരികെ നല്‍കില്ലെന്ന നിലാപാടായിരുന്നു സ്‌കൂളിന്റേത്. പരീക്ഷാ ഫലം പോലും വരും മുമ്പേ എങ്ങനെ അഡ്മിഷന്‍ നടത്തിയെന്ന് സ്‌കൂള്‍ പ്രിന്‍സിപ്പലിനോട് ചോദിച്ചപ്പോള്‍ താല്‍ക്കാലിക അഡ്മിഷനാണ് നടത്തിയതെന്നായിരുന്നു മറുപടി. പ്ലസ് വണ്ണിലേക്ക് ആവശ്യത്തിന് കുട്ടികള്‍ ഇല്ലാത്തത് പരിഹരിക്കാനുള്ള സ്‌കൂളിന്റെ നീക്കമാണ് പത്താം ക്ലാസ് പരീക്ഷാ ഫലം വരും മുമ്പേ ഉള്ള ഈ അഡ്മിഷന്‍ എന്നാണ് രക്ഷിതാക്കളുടെ ആരോപണം.