കമ്പിക്കഥ വീഡിയോകൾ പ്രചരിപ്പിക്കുന്ന യുട്യൂബ് ചാനലിൽ സ്ത്രീകൾക്കെതിരെ അശ്ലീല കഥകളുണ്ടാക്കി വീഡിയോ പോസ്റ്റ് ചെയ്ത വിജയ് പി.നായരെ കയ്യേറ്റം ചെയ്ത സംഭവത്തിൽ ഫെമിനിസ്റ്റുകളായ ഡബിംഗ് ആർട്ടിസ്റ്റ് ഭാഗ്യലക്ഷ്മി, ദിയ സന, ശ്രീലക്ഷമി അറയ്ക്കൽ തുടങ്ങിയവർക്കെതിരെ പൊലീസ് കേസെടുത്തു. വിജയ് പി നായരുടെ പരാതിയിലാണ് തമ്പാനൂർ പൊലീസ് കേസെടുത്തത്.
കമ്പിക്കഥ വീഡിയോക്കാരനെ അസഭ്യം പറഞ്ഞതിനും, ഭീഷണിപ്പെടുത്തിയതിനുമാണ് കേസ്. ഇവർക്കെതിരെ മോഷണക്കുറ്റവും ചുമത്തിയിട്ടുണ്ട്. ഇന്നലെ വൈകിട്ട് ആറോടെയായിരുന്നു സംഭവം.പോലീസിൽ പരാതികൾ നൽകിയിട്ടും നീതിലഭിക്കായ്കയാൽ ഭാഗ്യലക്ഷ്മിയും സംഘവും തമ്പാനൂർ ഗാന്ധാരിയമ്മൻ കോവിൽ റോഡിൽ ഇയാൾ താമസിച്ചിരുന്ന ലോഡ്ജിലെത്തി കരി ഓയിൽ ഒഴിച്ചശേഷം മർദ്ദിച്ച് മാപ്പു പറയിപ്പിക്കുകയായിരുന്നു.

മർദ്ദന ദൃശ്യങ്ങൾ സോഷ്യൽ മീഡിയയിൽ ദിയ ലൈവായി പങ്കുവച്ചിരുന്നു. സൈക്കോളജിയിൽ ഓണററി ഡോക്ടറേറ്റുണ്ടെന്ന് അവകാശപ്പെടുന്ന വിജയ് പി. നായർ പേരെടുത്ത് പറഞ്ഞും, വ്യക്തികളെ തിരിച്ചറിയുന്ന തരത്തിൽ സൂചന നൽകിയുമായിരുന്നു അശ്ളീല പരാമർശങ്ങൾ നടത്തിയത്. സ്ത്രീകൾ സംഘം സംഭവസ്ഥലത്തു നിന്നും ലാപ്ടോപും മൊബൈൽഫോണും പിടിച്ചെടുത്ത് തമ്പാനൂർ പൊലീസ് സ്റ്റേഷനിലെത്തി ഇയാൾക്കെതിരെ പരാതി നൽകിയിരുന്നു. ഇവ മോഷ്ടിച്ചെന്നാണ് നായരുടെ പരാതി. ഇടികൊണ്ടതിന് ആദ്യം പരാതിയില്ലെന്ന് പറഞ്ഞ നായർക്കിപ്പോൾ പരാതിയുണ്ടെന്നാണ് പറയുന്നത്.