പരമപൂജനീയ സ്വാമി ഗംഗേശാനന്ദ നിന്തിരുവടിയുടെ ജനനേന്ദ്രിയം മുറിച്ച കേസില് പുനരന്വേഷണത്തിന് ക്രൈബ്രാഞ്ച് മേധാവി ടോമിന് ജെ തച്ചങ്കരി ഉത്തരവിട്ടു. കൃത്യം ചെയ്തെന്ന് പറയുന്ന പെണ്കുട്ടി പരാതി പിന്വലിച്ചതും അന്വേഷിക്കും. സ്വാമിയെ മാത്രം പ്രതിയാക്കിയ പോലീസ് അന്വേഷണത്തില് ഒട്ടേറെ വീഴ്ചകളുണ്ടെന്നാണ് ക്രൈംബ്രാഞ്ച് റിപ്പോര്ട്ടില് പറയുന്നത്.
കേസ് അന്വേഷിക്കാന് ഐജിയുടെ നേതൃത്വത്തിലുള്ള പ്രത്യേക സംഘത്തെ നിയോഗിക്കും. പീഡന ശ്രമത്തിനിടെ അക്രമിച്ചുവെന്നായിരുന്നു 23കാരിയായ വിദ്യാര്ഥിനിയുടെ ആദ്യ മൊഴി. അതേ സമയം സ്വന്തം സഹായിയാണ് അക്രമിച്ചതെന്നായിരുന്നു സ്വാമി ഗംഗേശാനന്ദ നല്കിയ പരാതി.
2017ലാണ് കേസിനാസ്പദമായ സംഭവം നടന്നത്. വീട്ടില് അതിഥിയായി എത്തിയ ഗംഗേശാനന്ദ ലൈംഗികമായി അക്രമിക്കാന് തുനിഞ്ഞപ്പോള് കത്തി ഉപയോഗിച്ച് ജനനേന്ദ്രിയം മുറിക്കുകയായിരുന്നുവെന്നാണ് ആദ്യം പരാതി ഉയര്ന്നത്. ഇതിന്റെ അടിസ്ഥാനത്തിലാണ് തിരുവനന്തപുരം പേട്ട പോലീസ് കേസ് രജിസ്റ്റര് ചെയ്തതും.
പിന്നാലെ പെണ്കുട്ടി കോടതിയിലടക്കം മൊഴി മാറ്റി പറയുകയും ചെയ്തു. സ്വയം മുറിച്ചതാണെന്നും സഹായി മുറിച്ചതാണെന്നുമടക്കം പറഞ്ഞ് ഗംഗേശാനന്ദയും മൊഴി മാറ്റി പറഞ്ഞിരുന്നു.
