കേരളത്തെ ആകാംക്ഷയുടെ മുൾമുനയിൽ നിറുത്തിയ മരടിലെ ഫ്ലാറ്റുകൾക്ക് ആയുസ് ഇന്ന് രാത്രി കൂടി. നാളെ രാവിലെ ആദ്യരണ്ട് ഫ്ലാറ്റുകൾ നിലംപൊത്തും. നാട്ടുകാരെ ബുദ്ധിമുട്ടിക്കാതെ ഫ്ലാറ്റ് പൊളിച്ചെടുക്കുക എന്ന വലിയ ദൗത്യമാണ് കേന്ദ്ര, സംസ്ഥാന സർക്കാരുകളുടെ വിവിധ വകുപ്പുകൾക്ക് നിറവേറ്റേണ്ടത്. സ്ഫോടക വസ്തുക്കൾ നിറച്ച നാല് ഫ്ലാറ്റുകളിലും പെട്രോളിയം ആൻഡ് എക്സ്പ്ലോസിവ് സേഫ്ടി ഓർഗനൈസേഷൻ ചെന്നൈ ഐ.ഐ.ടി വകുപ്പുകൾ പരിശോധന നടത്തി. പരിശോധന ഇന്നും തുടരും. ഇന്ന് പ്രദേശത്ത് സ്ഫോടനം ഒഴികെയുള്ള മറ്റുവകുപ്പുകളുടെ ഏകോപനം നിശ്ചയിക്കാനായി മോക്ഡ്രിൽ നിശ്ചയിച്ചിട്ടുണ്ട്. ഫ്ലാറ്റുകൾക്ക് സമീപത്തെ കെട്ടിടങ്ങളുടെ സ്ട്രക്ചറൽ ഓഡിറ്റ് റിപ്പോർട്ട് ഇന്ന് സമർപ്പിക്കും.
നിയന്ത്രിത സ്ഫോടനത്തിന് ഫ്ലാറ്റുകള് സജ്ജമാണ്. ആശങ്കപ്പെടാന് ഒന്നുമില്ല. ഇന്ഷുറന്സ് സംബന്ധിച്ചും ആശയക്കുഴപ്പം ഇല്ല. ഫ്ലാറ്റുടമകള്ക്ക് കോടതി നിശ്ചയിച്ച പോലെ നഷ്ടപരിഹാരം നല്കും. സ്ഫോടനത്തിന്റെ സമയക്രമത്തിലും ആശയക്കുഴപ്പം ഇല്ലെന്നും ചീഫ് സെക്രട്ടറി പറഞ്ഞു.
ശനിയാഴ്ചയാണ് മരടിലെ ഫ്ലാറ്റുകള് പൊളിക്കാന് തുടങ്ങുക. മുന്നോടിയായി നാളെ മോക്ക് ഡ്രില് നടത്തും. രാവിലെ ഒമ്പത് മുതല് ആണ് മോക്ക് ഡ്രില് ആരംഭിക്കുക. സ്ഫോടന ദിവസം നടക്കുന്ന കാര്യങ്ങളെക്കുറിച്ച് സമീപവാസികള്ക്ക് അറിവ് നല്കാന് കൂടിയാണിത്. സ്ഫോടന സമയത്ത് ആംബുലന്സുകളും ഫയര് എന്ജിനുകളും ഏതൊക്കെ സ്ഥലത്തു വേണമെന്നും സ്ഫോടന ശേഷം ഇവ എങ്ങോട്ട് പോകണമെന്നത് സംബന്ധിച്ചും കൃത്യമായ ധാരണ ഉണ്ടാക്കും.