കേരളത്തിന്റെ ദത്തുപുത്രിയെന്ന് മുഖ്യമന്ത്രി പിണറായി വിജയന് വാഴ്ത്തിയ ഹനാന് കൊച്ചി മാരിയറ്റ് ഹോട്ടലില് 1200 രൂപയ്ക്കു ഹുക്ക വലിക്കുന്നു എന്ന കുറിപ്പോടെ സോഷ്യല് മീഡിയയില് പ്രചരിക്കുന്ന വീഡിയോയ്ക്കെതിരെ ഹനാന് രംഗത്ത്. സിനിമാ ചര്ച്ചകള്ക്ക് മാരിയറ്റ് ഹോട്ടലില് പോയപ്പോള് കൗതുകത്തിന് വേണ്ടി വലിച്ചതാണ് ഹുക്കയെന്നും അതില് നിക്കോട്ടിന് ഇല്ല എന്ന് ഉറപ്പ് വരുത്തിയതിന് ശേഷമാണ് വലിച്ചതെന്നും ഹനാന് വ്യക്തമാക്കി.
വീഡിയോ പ്രചരിക്കുന്നവര്ക്കെതിരെ ഹനാന് കൊച്ചി പൊലീസ് കമ്മീഷണര്ക്ക് പരാതി നല്കി. പഠനത്തിനിടെ മീന്വില്പന നടത്തി സോഷ്യല് മീഡിയയില് ഏറെ ശ്രദ്ധയാകര്ഷിച്ച കുട്ടിയാണ് ഹനാന്.
മീന് വില്ക്കുന്നവരും പാവപ്പെട്ടവരുമൊന്നും വലിയ ഹോട്ടലുകളിലൊന്നും പോകരുത്, നല്ല വസ്ത്രം ധരിക്കരുത് എന്നൊക്കെ കരുതുന്നവരാണ് ഇത്തരം പ്രവൃത്തികള് ചെയ്യുന്നത്. ഞാന് പട്ടിണി കിടക്കുന്നത് കണ്ടാലേ അവര്ക്ക് സന്തോഷമാകൂ. മീല്വില്പനയൊക്കെ മോശം ജോലിയായാണ് അവര് കരുതുന്നത്. എന്നാല്, ഏത് തൊഴിലിനും മഹത്വമുണ്ട്. അതുകൊണ്ടാണ് കേരള ജനതയുടെ വലിയ പിന്തുണ എനിക്ക് ലഭിച്ചത്.
ഞാന് മാത്രമല്ല, പഠനത്തോടൊപ്പം ജോലിയുമായി മുന്നോട്ടു പോകുന്ന ഒരുപാട് വിദ്യാര്ത്ഥികള് ഇവിടെയുണ്ട്. അവരെ പോലെ തന്നെയാണ് ഞാനും. ഒരു പ്രത്യേകതയുള്ളത്, എനിക്കെതിരെ തുടര്ച്ചയായി സൈബര് ആക്രമണങ്ങള് ഉണ്ടാകുന്നു എന്നതു മാത്രമാണ്. തനിക്കെതിരെ നടക്കുന്ന സോഷ്യല് മീഡിയ പ്രചാരണങ്ങള്ക്കെതിരെ ഹനാന് ഫെയ്സ്ബുക്ക് ലൈവും ചെയ്തിരുന്നു.
മീന് വില്പന നടത്തിയാല് പിന്നെ കാറില് സഞ്ചരിക്കാന് പാടില്ല. സ്റ്റാര് ഹോട്ടലില് പോകാന്പാടില്ല. വിലപിടിപ്പുള്ള വസ്ത്രം ധരിക്കാന് പാടില്ല. സ്വര്ണം ഉപയോഗിക്കാന് പാടില്ല. ഇപ്പോള് ദേ, ഹുക്കാ. ചിലര് പിന്നാലെ കൂടിയിരിക്കുകയാണ്. മഞ്ഞയില് മാത്രം വാര്ത്തകള് കാണുന്ന ചിലര്.
എന്റെ ആദ്യത്തെ വാര്ത്തയില് തന്നെ പറയുന്നുണ്ട്. ദാരിദ്ര്യമല്ല, പല ജോലികള്ചെയ്ത് അധ്വാനിച്ചാണ് ജീവിക്കുന്നതെന്ന്. അത്തരം ജോലികള് ആരോഗ്യം വീണ്ടെടുത്തത് മുതല് ചെയ്ത് പോരുന്നു. ഇനിയും തുടരും. സിനിമയില് നിന്ന് അവസരം ലഭിച്ചിരുന്നു. അഭിനയിക്കാനും, പാടാനും അവസരം ലഭിച്ചു. ഇതിന്റെ ചര്ച്ചക്കായി എന്നെ ഹോട്ടലില് വിളിച്ചാല് ഞാന് മീന് വില്പനക്കാരിയാണ്, എനിക്ക് ഹോട്ടല് അയിത്തമാണെന്ന് പറയാനാകുമൊ ഞാനും സ്റ്റാര് ഹോട്ടലൊക്കെ കണ്ടോട്ടേ ചേട്ടാ..
പല സ്ഥലങ്ങളിലും പോകുമ്പോള് പലരും നിര്ബന്ധിക്കാറുണ്ട്, ഭക്ഷണം കഴിക്കാനും മറ്റും. ഇത്തരത്തില് ഹുക്കയെ കുറിച്ചൊരു കൗതുകം തോന്നി. പുകയില വിഭാഗത്തില് പെടുന്നതല്ലെന്ന് ഉറപ്പ് വരുത്തിയ ശേഷം മാത്രമാണ് അത് ഉപയോഗിച്ചത്.
എന്നാല് ചിലര്ക്ക് എന്റെ ജീവിത രീതിയാണ് പ്രശ്നം. ഞാന് പട്ടിണി കിടക്കുന്നത് കണ്ടാലെ അവര്ക്കൊരു ആശ്വാസമുള്ളു. പിന്നെ മീന് വില്പന അത്ര മോശം പണിയല്ലട്ടോ. അതിനൊരു തൊട്ടുകൂടായ്മയുമില്ല. എല്ലാ ജോലികള്ക്കും അതിന്റേതായ മഹത്വമുണ്ട്. പിന്നെ ഒരു പെണ്കുട്ടിയുടെ ഫോട്ടോ അവരുടെ അനുവാദം കൂടാതെ എടുക്കുന്നതും പ്രചരിപ്പിക്കുന്നതും നല്ല കാര്യമല്ല.
പിന്നെ മഞ്ഞ വാര്ത്തകള് മാത്രം കൊടുക്കുന്ന മലയാളിവാര്ത്ത എന്ന പേരുളള ഓണ്ലൈന്കാരുടെ പണിയും കലക്കിയിട്ടുണ്ട്. നല്ല റേറ്റിങ് കിട്ടിയല്ലോ അല്ലേ… ഇനിയും എന്റെ പിന്നാലെ ഒളിഞ്ഞ് നോക്കാന് വന്നാല് മീന് വെള്ളം തന്നെ തലയില്കമിഴ്ത്തും. ഹനാന് ഫെയ്സ്ബുക്ക് ലൈവില് പറഞ്ഞു.