Sun. Nov 22nd, 2026

സ്വർഗത്തിലേക്കുള്ള കവാടം തുറക്കുന്ന മാസം. പങ്കിലക്കാട്ടിൽ കർക്കിടകം ഒന്നുമുതൽ “ഡിങ്കായണ മാസാചരണം തുടങ്ങി. ഡിങ്കായണ മാസത്തോടനുബന്ധിച്ചു പങ്കിലക്കാട്ടിൽ നടക്കുന്ന ഡിങ്കമത പഠന ക്‌ളാസുകളിലും ഒരുമാസം നീണ്ടുനിൽക്കുന്ന വിശുദ്ധ ബാലമംഗള പാരായണവും ബാലമംഗള സത്രവും കർക്കിടകം ഒന്നുമുതൽ ആരംഭിച്ചു.കൊവിഡ് പ്രോട്ടോകോൾ പാലിച്ചുകൊണ്ടായിരിക്കും ആചാരങ്ങൾ നടത്തുക. ഡിങ്കയാണ മാസത്തിൻറെ സമാപന ദിവസം നടക്കുന്ന ഡിങ്കമത മഹാസത്രത്തിൽ വെച്ച് മൂഷിക ഊട്ട് നടത്തുമെന്നും മൂഷികസേന മുഖ്യകാര്യദർശി അറിയിച്ചു.

ഡിങ്കമത മഹാസത്രത്തിത്തിൻറെ മറവിൽ വൻതോതിലുള്ള മതപരിവർത്തനമാണ് മൂഷികസേന ലക്ഷ്യമിടുന്നതെന്ന് മായാവിസ്റ്റുകൾ ആരോപണമുന്നയിക്കുന്നുണ്ടെങ്കിലും  ഇതെല്ലം അടിസ്ഥാന രഹിതമായ ആരോപണങ്ങളും കുപ്രചരണങ്ങളും ആണെന്നാണ് പങ്കിലക്കാട്ടിലെ ഡിങ്കമത ഹെഡ് ക്വാർട്ടേഴ്സിൽ നിന്നും അറിയിച്ചത്. സ്വമനസാലെ പങ്കിലക്കാട്ടിൽ വിശുദ്ധ ബാലമംഗളത്തെക്കുറിച്ച് കൂടുതൽ ആഴത്തിലുള്ള പഠനത്തിന് താത്പര്യപ്പെട്ട് എത്തുന്നവർക്ക് മതപഠനത്തിനു ശേഷം പൂർണ്ണ മനസ്സുണ്ടെങ്കിൽ ഡിങ്കമതം സ്വീകരിച്ചാൽ മതിയെന്നും ഡിങ്കമതം സ്വീകരിച്ചേ പറ്റൂ എന്ന് തങ്ങൾ ആരെയും നിർബന്ധിക്കാറില്ലെന്നും അവർ വ്യക്തമാക്കി.

മുപ്പത് ദിവസത്തേക്ക് മത്സ്യ മാംസാദികൾ വെടിഞ്ഞ് സസ്യാഹാരവും വിശുദ്ധ ബാലമംഗളം പാരായണവുമായി ഡിങ്ക വിശ്വാസികൾ തീവ്ര ഭക്തിയുടെ ലോകത്തേക്ക് കടക്കുന്ന മാസമാണിതെന്നും അനാവശ്യ വിവാദങ്ങൾ ഈ വിശുദ്ധ മാസത്തിൽ ഉണ്ടാക്കരുതെന്നും ഡിങ്ക മത തന്ത്രികൾ കണ്ഠരര് ഫിലിപ്പരര് മൂഷികരര് പറഞ്ഞു.ഡിങ്കൻ സൃഷ്ടിച്ച സൂര്യനെ ആശ്രയിച്ചാണ് ലോകത്ത് കാലഗണനയും പ്രകൃതിയിലെ മാറ്റങ്ങളും സംഭവിച്ച് കൊണ്ടിരിക്കുന്നത്. ഡിങ്ക ലോകത്ത് ഏറ്റവും കൂടുതൽ മഴ ലഭിക്കുന്ന സമയമാണ് “ഡിങ്കായണ മാസം”. ആകാശം ഡിങ്കനെ കൊണ്ട് മൂടപ്പെട്ട് ഇടമുറിയാതെ മഴ പെയ്യുന്ന മാസമായതിനാലാണ് “ഡിങ്കായണ മാസം” എന്ന പേര് വീണത്. ഡിങ്കയാണ മാസത്തിൽ ജെട്ടിയും മൽസ്യ മാംസാദികളും വർജ്യമാണ്.

മത്സ്യ മാംസാദികൾ കൃത്രിമശീതികരണികളിൽ സൂക്ഷിക്കുന്ന ശീലം ഇല്ലാത്തതിനാൽ അവ വെയിൽ കൊള്ളിച്ച് ഉണക്കാൻ കഴിയാത്തത് കൊണ്ടും , വിശുന്ധ തിരു ജട്ടികൾ ഉണങ്ങാൻ ഫാനിൽ തൂക്കുന്നതു കൊണ്ടുമാണ് “ഡിങ്കായണ മാസം” മാസം പൂർണ്ണ വിതൗട്ട് വെജിറ്റേറിയനായി ആചരിക്കുന്നത്. മഴമൂലം തന്റെ സത്യവിശ്വാസികൾ ഇരതേടാനാകാതെ പട്ടിണി കിടക്കരുത് എന്ന് ഡിങ്ക ഭഗവാന് നിർബന്ധമുള്ളതിനാൽ അന്നദാനം ഈ മാസത്തിൽ ഓരോ ഡിങ്ക വിശ്വാസിക്കും നിർബന്ധമാണ്.

തന്റെ ചുറ്റിലുമുള്ള പത്ത് വീടുകളിൽ ഉള്ളവർ ആഹാരം കഴിച്ചുവോ എന്ന് ഉറപ്പാക്കേണ്ട ബാദ്ധ്യത ഓരോ ഡിങ്ക വിശ്വാസിയ്ക്കും ഉണ്ട്.വിശുദ്ധ ബാലമംഗള പാരായണം അന്നദാനം എന്നിവ ഈ മാസത്തിൽ നിർബന്ധമാണ്. എല്ലാ ഡിങ്ക മത വിശ്വാസികൾക്കും ഭക്തി സാന്ദ്രമായ സാനിറ്റയിസർ തുളുമ്പുന്ന ഡിങ്കായണ മാസ ആശംസകൾ !! മറ്റ് വിവാദങ്ങളിൽ നിന്ന് ഒഴിവായിക്കൊണ്ട് ഡിങ്കമത വിശ്വാസികൾ ഈ വിശുദ്ധമാസം വിശുദ്ധ ബാലമംഗള പാരായണത്തിലും ആത്മീയ കാര്യങ്ങളിലും മുഴുകി കഴിയണമെന്ന് അദ്ദേഹം ഉത്‌ബോധിപ്പിച്ചു.

ഈ പുണ്യമാസത്തിൽ ഡിങ്കമതത്തിലെ ഭക്തപ്രസ്ഥാനക്കാരായ വിവിധ കവികൾ രചിച്ച താഴെകൊടുത്തിട്ടുള്ള ഡിങ്ക കീർത്തനങ്ങൾ ആലപിച്ചും വിശുദ്ധ ബാലമംഗളം പാരായണം ചെയ്തും വ്രതശുദ്ധിയോടെ അന്യവിചാരങ്ങൾ വിട്ടൊഴിഞ്ഞു ഡിങ്കഭഗവാനിൽ പൂർണ്ണ ഭക്തിയോടും പൂർണ്ണ മനസോടും പൂർണ്ണ ശരീരത്തോടും പൂർണ്ണ ആത്മാവോടും കഴിയേണ്ടതാണ്

ഹരേ ഡിങ്ക ഹരേ ഡിങ്ക
ഡിങ്ക ഡിങ്ക ഹര ഹരേ
ഹരേ കപ്പ ഹരേ കപ്പ
കപ്പ കപ്പ ഹര ഹരേ .

ഡിങ്ക.. ഡിങ്ക.. ഡിങ്ക.. ഡിങ്ക… ഡിങ്കനാമ പാഹിമാം…
ഡിംങ്ക പാദം ചേരണേ… മുകുന്ദ ഡിങ്ക പാഹിമാം…

ഡിങ്കദേവ പാഹിമാം
പങ്കിലേശ്വരാ ജയിക്ക സന്തതം നമോസ്തുതേ
കേരകന്റെ വാൽ പിടിച്ചു ചുറ്റിയങ്ങെറിഞ്ഞതും
കപ്പനല്കിടുന്നവർക്കനുഗ്രഹങ്ങൾ നല്കിയും
മോട്ടുവിന്റെ മോന്തയിൽ തലോടിയങ്ങിരുന്നിടും
പങ്കിലേശ്വരാ ജയിക്ക സന്തതം നമോസ്തുതേ
ഭക്തിയില്ലയെങ്കിലും പരിഭവിച്ചിടാത്തൊരു
ഡിങ്ക ഡിങ്ക ഡിങ്ക ഡിങ്ക ഡിങ്കദേവപാഹിമാം
അരുണവർണ്ണ ജട്ടിയാൽ പ്രശോഭിതം സുശോഭനം
ഡിങ്ക ദേവ ഡിങ്ക ഡിങ്ക ഡിങ്ക ഡിങ്ക പാഹിമാം …