മലപ്പുറം: എം എസ് എസ് എഫ് സംസ്ഥാന പ്രസിഡന്റ് പി കെ നവാസിനെതിരെ ലീഗ് അഖിലേന്ത്യ ട്രഷറര്‍ ഇ ടി മുഹമ്മദ് ബഷീര്‍ നടത്തുന്ന പ്രതികരണം എന്ന നിലയില്‍ പുറത്തുവന്ന ശബ്‌ദരേഖ സ്ഥിരീകരിച്ച് നേതൃത്വം. വര്‍ഷങ്ങള്‍ക്ക് മുമ്പ് നടന്ന ഇ ടിയുടെ സ്വകാര്യ സംഭാഷണമാണ് പുറത്തുവന്നതെന്നും ഇത്തരം സംഭവങ്ങള്‍ പുറത്തുവിട്ട് മാന്യന്‍മാരെ അപമാനിക്കരുതെന്നും സംസ്ഥാന പ്രസിഡന്റ് പി എം സലാം പറഞ്ഞു. ഹരിത വിവാദം പാര്‍ട്ടി അവസാനിപ്പിച്ചതാണ്. ഇതില്‍ ഇനി ചര്‍ച്ചയില്ലെന്നും സലാം പറഞ്ഞു.
ഹരിത വിഷയത്തില്‍ ഒരു വിഭാഗത്തിനെതിരെ മാത്രം നടപടി സ്വീകരിച്ചത് ശരിയായില്ലെന്ന് ഇ ടി മുഹമ്മദ് ബഷീര്‍ പറയുന്ന ശബ്‌ദരേഖയാണ് പുറത്ത് വന്നത്. പി കെ നവാസിനെതിരെയും നടപടി വേണ്ടതായിരുന്നു. ഇക്കാര്യത്തില്‍ പാര്‍ട്ടിയോട് തന്റെ നിലപാട് വ്യക്തമാക്കിയിരുന്നുവെന്നും ഇ ടിയുടെ പുറത്തുവന്ന ഫോണ്‍ സംഭാഷണത്തില്‍ പറയുന്നു. ഹരിത വിഷയം സങ്കീര്‍ണമാക്കാന്‍ കാരണം നവാസാണ്. എം എസ് എഫിനെ പിണക്കി, ഹരിതയേയും പിണക്കി. പ്രശ്‌നങ്ങള്‍ക്ക് മുഴുവന്‍ കാരണം നവാസാണ്. സംഘടന നന്നാവാന്‍ നവാസിനെ മാറ്റിനിര്‍ത്തുക മാത്രമാണ് വഴിയെന്നും ഇ ടി പറയുന്നു. എന്നാല്‍ ഇക്കാര്യത്തില്‍ ഔദ്യോഗിക വിശദീകരണം നല്‍കാന്‍ ഇടി തയ്യാറായിട്ടില്ല. ശബ്‌ദ സന്ദേശം എപ്പോള്‍, ആരോടാണ് സംസാരിച്ചെതെന്ന കാര്യം തനിക്കറിയില്ലെന്ന നിലപാടിലാണ് അദ്ദേഹം.
