Sunday, July 25, 2021

Latest Posts

സുകുമാരക്കുറുപ്പ് മതംമാറി സൗദി അറേബ്യയിൽ;നിര്‍ണ്ണായക വിവരങ്ങള്‍ പോലീസിന് ലഭിച്ചു

പിടികിട്ടാപ്പുള്ളി  ചാക്കോ വധക്കേസ് പ്രതി സുകുമാരക്കുറുപ്പിനെക്കുറിച്ച് പോലീസിന് നിര്‍ണ്ണായക വിവരങ്ങള്‍ ലഭിച്ചു. മൂന്നു പതിറ്റാണ്ടോളമായി പിടികിട്ടാപുള്ളിയായി ഒളുവില്‍ കഴിയുന്ന സുകുമാരക്കുറുപ്പ് അടിമുടി മാറി എന്നാണ് പോലിസിന് ലഭിച്ച വിവരം. കാരണം കക്ഷി ഇപ്പോള്‍ ഇസ്ലാം മതം സ്വീകരിച്ച് മുസ്തഫയായി മാറി മദീനയിലെ ഒരു മുസ്ലീം പള്ളിയില്‍ ഖത്തീബിനെ മതകാര്യങ്ങളില്‍ സഹായിച്ചു സുരക്ഷിതനായി വാഴുകയാണ്. മുസ്തഫ എന്ന കുറുപ്പിന്‌ നാട്ടിലേക്കു മടങ്ങാന്‍ ആഗ്രഹമുണ്ടെങ്കിലും നിയമക്കുരുക്കു ഭയന്ന്‌ ഇനിയുള്ള കാലം സൗദിയില്‍ തന്നെ തുടരാനാണ് തീരുമാനം എന്ന് ബന്ധുക്കള്‍ക്ക് വിവരം ലഭിച്ചതായി പോലീസ് പറഞ്ഞു.

സൗദിയിലെ അല്‍-ഖസീമില്‍ ഏറെക്കാലം ചെലവഴിച്ച കുറുപ്പ്‌ കഴിഞ്ഞ മൂന്നുവര്‍ഷമായി മദീനയിലാണു താമസം. സുകുമാരക്കുറുപ്പ്‌ ഗള്‍ഫ്‌ രാജ്യങ്ങളില്‍ എവിടെയോ ഒളിവില്‍ കഴിയുന്നതായി കേരളാ പോലീസിനു സൂചന ലഭിച്ചിരുന്നെങ്കിലും ഇന്റര്‍പോളിന്റെ സഹായത്തോടെ ഇയാളെ പിടികൂടാന്‍ യാതൊരു ശ്രമവും നടത്തിയില്ല.

കുറുപ്പിന്റെ തിരോധാനത്തെക്കുറിച്ച് ഒരു പ്രമുഖ മാധ്യമം നടത്തിയ അന്വേഷണമാണ് കുറുപ്പ് സൗദി അറേബ്യയില്‍ സുരക്ഷിതനാണെന്ന വിവരം ബന്ധുക്കളില്‍ നിന്നും ലഭിക്കുന്നത്. എന്നാല്‍ അവരാരും കഴിഞ്ഞ 33 വര്‍ഷമായി കുറുപ്പിനെ നേരില്‍ കണ്ടിട്ടില്ല. സുകുമാരക്കുറുപ്പിന്റെ ഭാര്യ സരസമ്മ(63)യും രണ്ടു മക്കളും ഇപ്പോള്‍ കുവൈത്തിലാണു താമസം. ഇവര്‍ കുവൈത്തില്‍ താമസമുറപ്പിക്കാനുള്ള കാരണം തേടിയപ്പോഴാണു കുറുപ്പ്‌ ഗള്‍ഫ്‌ രാജ്യങ്ങളില്‍ എവിടെയെങ്കിലും ഉണ്ടാകുമെന്ന നിഗമനത്തില്‍ ക്രൈംബ്രാഞ്ച്‌ എത്തിച്ചേര്‍ന്നത്‌.

അബുദാബിയില്‍ കുറുപ്പിനൊപ്പമുണ്ടായിരുന്ന സരസമ്മ അവിടെ നഴ്‌സായിരുന്നു. ചാക്കോ കൊല്ലപ്പെട്ടശേഷം അവര്‍ നാട്ടിലെത്തി. എട്ടുലക്ഷം രൂപയുടെ ഇന്‍ഷുറന്‍സ്‌ തുക തട്ടിയെടുക്കാന്‍ ഭര്‍ത്താവ്‌ നടത്തിയ നീക്കങ്ങള്‍ അറിയാമായിരുന്നതിനാല്‍ സരസമ്മയും ആദ്യം കേസില്‍ പ്രതിയായിരുന്നു. എന്നാല്‍, പിന്നീട്‌ ഇവരെ ഒഴിവാക്കി. തുടര്‍ന്ന്‌ ഏറെക്കാലം ചെങ്ങന്നൂരിനടുത്ത്‌ ചെറിയനാട്ടുതന്നെ താമസിച്ച സരസമ്മ പിന്നീടു സൗദിയിലേക്കു പോയി. വീണ്ടും നാട്ടില്‍ തിരിച്ചെത്തി നാളുകള്‍ക്കുശേഷമാണു കുവൈത്തിലേക്കു പോയത്‌. മക്കള്‍ക്കും കുവൈത്തില്‍ ജോലി കിട്ടിയതോടെ അവിടെ സ്‌ഥിരതാമസമാക്കി.

കുറുപ്പ്‌ ഇടയ്‌ക്കിടെ സൗദിയില്‍നിന്നു കുവൈത്തിലെത്തി കുടുംബത്തെ സന്ദര്‍ശിക്കാറുണ്ടെന്നാണു വിവരം.പ്ലാസ്‌റ്റിക്‌ സര്‍ജറി ചെയ്‌തു മുഖത്തിന്റെ രൂപം മാറ്റിയാണു കുറുപ്പ്‌ ഒളിവില്‍ കഴിയുന്നതെന്ന അഭ്യൂഹത്തിനായിരുന്നു ഏറെ പ്രചാരം. എന്നാല്‍, അതില്‍ കഴമ്പില്ലെന്നാണു ബന്ധുക്കളുടെ വിശ്വാസം. കുറുപ്പിന്റെ കാര്യത്തില്‍ മതവും പേരും മാത്രമാണു മാറിയത്‌. നിലവില്‍ കുറുപ്പിന്റെ സഹോദരങ്ങളാരും നാട്ടിലില്ല. ചെറിയനാട്ടിലെ കുറുപ്പിന്റെ വസ്‌തുവകകള്‍ സര്‍ക്കാര്‍ കണ്ടുകെട്ടി.

കുറുപ്പിനു ചാക്കോ വധത്തില്‍ നേരിട്ടു ബന്ധമില്ലെന്നാണ്‌ ഇവരുടെ വിശ്വാസം. ഇന്‍ഷുറന്‍സ്‌ തുക തട്ടിയെടുക്കുന്നതിനായി സുകുമാരക്കുറുപ്പിനോടു രൂപസാദൃശ്യമുള്ള ഫിലിം റെപ്രസന്റേറ്റീവ്‌ ചാക്കോയെ കൊലപ്പെടുത്തി കാറിലിട്ടു കത്തിച്ചെന്നാണു കേസ്‌. ഇന്‍ഷുറന്‍സ്‌ തട്ടാനായി കൊലപാതകം നടത്താന്‍ പദ്ധതിയുണ്ടായിരുന്നില്ല. കുറുപ്പിനോടു രൂപസാദൃശ്യമുള്ള മൃതദേഹം സംഘടിപ്പിച്ചു കത്തിക്കാനായിരുന്നു നീക്കം. 1984 ജനുവരി 21-ന്‌ ഉച്ചകഴിഞ്ഞാണ്‌ ആലപ്പുഴ മെഡിക്കല്‍ കോളജില്‍നിന്നു മൃതദേഹം സംഘടിപ്പിക്കാന്‍ കുറുപ്പിന്റെ ഭാര്യാസഹോദരന്‍ ഭാസ്‌ക്കരപിള്ള, ഡ്രൈവര്‍ പൊന്നപ്പന്‍, കുറുപ്പിന്റെ സുഹൃത്തും സഹായിയുമായ ചാവക്കാട്ടുകാരന്‍ ഷാഹു എന്നിവര്‍ ചെറിയനാട്ടില്‍നിന്നു കാറില്‍ തിരിച്ചത്‌. മറ്റൊരു കാറില്‍ കുറുപ്പും ഒപ്പമുണ്ടായിരുന്നു.

എന്നാല്‍, കൊല്ലകടവില്‍ എത്തിയപ്പോള്‍, ആശുപത്രിയില്‍ കഴിയുന്ന അമ്മ ദേവകിയെ കാണാന്‍ കുറുപ്പ്‌ പന്തളത്തേക്കു പോയെന്നു ബന്ധുക്കള്‍ പറയുന്നു. ആലപ്പുഴ മെഡിക്കല്‍ കോളജ്‌ ജീവനക്കാരനായ ബന്ധു മധുവിന്റെ സഹായത്തോടെ മോര്‍ച്ചറിയില്‍നിന്ന്‌ അജ്‌ഞാതമൃതദേഹം സംഘടിപ്പിക്കുകയായിരുന്നു ലക്ഷ്യം. എന്നാല്‍, ഭാസ്‌ക്കരപിള്ളയുടെ കെ.എല്‍.ക്യു. 7835 നമ്പര്‍ കാറില്‍ ശവം കത്തിച്ചശേഷം, മരിച്ചതു കുറുപ്പാണെന്നു വരുത്തിത്തീര്‍ക്കാനുള്ള ശ്രമം തുടക്കത്തിലേ പാളി. മെഡിക്കല്‍ കോളജില്‍നിന്നു ശവം സംഘടിപ്പിക്കാന്‍ ഇവര്‍ക്കു കഴിഞ്ഞില്ല. നിരാശരായി മടങ്ങുമ്പോഴാണു കരുവാറ്റയില്‍ കുറുപ്പിനോടു സാദൃശ്യമുള്ള ചാക്കോ വാഹനത്തിനു കൈ കാണിച്ചത്‌.

തുടര്‍ന്നായിരുന്നു കൊലപാതകം. കൊലപാതകസമയത്തു കുറുപ്പ്‌ ഇവര്‍ക്കൊപ്പം ഇല്ലായിരുന്നെന്നും പിന്നീടു ഭാസ്‌ക്കരപിള്ള പറഞ്ഞപ്പോഴാണു കുറുപ്പ്‌ കാര്യങ്ങള്‍ അറിഞ്ഞതെന്നും ബന്ധുക്കള്‍ പറയുന്നു. കൊലപാതകത്തില്‍ കുറുപ്പിനു വ്യക്‌തമായ പങ്കുണ്ടെന്നാണു പോലീസ്‌ രേഖകള്‍. കൊലപാതകശേഷം കുറുപ്പ്‌ മുങ്ങാനുള്ള കാരണത്തെപ്പറ്റി ബന്ധുക്കളും പോലീസും പറയുന്ന കാര്യങ്ങള്‍ സമാനമാണ്‌. ഗോപാലകൃഷ്‌ണക്കുറുപ്പെന്നാണു സുകുമാരക്കുറുപ്പിന്റെ യഥാര്‍ഥ പേര്‌. പ്രീഡിഗ്രി തോറ്റശേഷം മനസില്ലാമനസോടെ വ്യോമസേനയില്‍ ചേര്‍ന്നു. എങ്ങനെയെങ്കിലും അവിടെനിന്നു രക്ഷപ്പെടണമെന്ന ചിന്തയായിരുന്നു കുറുപ്പിന്‌. ഒടുവില്‍, അവധിക്കു നാട്ടിലെത്തിയപ്പോള്‍ കുറുപ്പ്‌ മരിച്ചെന്നു പറഞ്ഞ്‌ വ്യോമസേനാ അധികൃതര്‍ക്കു ടെലഗ്രാം അയച്ചു. നിജസ്‌ഥിതി അറിയാനെത്തിയ ചെങ്ങന്നൂര്‍ പോലീസിനെ കൈക്കൂലി കൊടുത്ത്‌ മടക്കി. തുടര്‍ന്ന്‌ സുകുമാരക്കുറുപ്പ്‌ എന്ന പേരില്‍ പാസ്‌പോര്‍ട്ട്‌ എടുത്ത്‌ ഗള്‍ഫിലേക്കു കടക്കുകയായിരുന്നു.

Latest Posts

spot_imgspot_img

Don't Miss

Stay in touch

To be updated with all the latest news, offers and special announcements.